Tež serbscy młodostni wužiwaja pisany spektrum poskitkow

Budyšin (SN/VaŽ). Bórze je zaso lěćo, a z tym zahaji so lětuša festiwalna sezona w srjedźnej Němskej. Mjez jězorami, před kulisu bywšich industrijnych twarjenjow abo druhdźe wotměwaja so tež lětsa mnohe znate hudźbne festiwale na wulkich jewišćach pod hołym njebjom. Wot skerje měrnych a wotpinacych partyjow hač k twjerdej techno-hudźbje je za kóždy hudźbny słód něšto pódla.

Sezonu zahaji Sputnik Spring Break Festival, kotryž so wot 22. do 25. meje w Saksko-Anhaltskej při Goitzscheskim jězorje wotměje. Swjatkowny kónc tydźenja přeměni so tamniša połkupa Pouch na swjedźenišćo. Wopytowarjo móža tam wjacore dny campować a tři dny swjećić. Festiwal skići měšany hudźbny program z elektroniskej hudźbu, hip-hopom, popom kaž tež z bijadłami a basom. Wuměłcy kaž Tream, Roj Bianco, a Zartmann so wo pisany program postaraja.