Jeli domizna swoju identitu zhubi, rěka to, zo so tež nałožki, tradicije a kultura pozhubja. Tutej temje wěnowaše so lětuša Błótowska powěsćowa nóc swjatkowny kónc tydźenja pod Bismarckowej wěžu w Bórkowach.

Bórkowy (MHi/SN). Mjeztym 10. raz je Serbski ludowy ansambl jewišćowu produkciju, lětsa pod titulom „Myšyn impossible abo Wanka, Janek a te tśi njemóžnosći“ wuhotował. Libretist Jürgen Westphal je jednanje do 1920tych lět zapołožił. Inscenacija pokaza čas po žnjach we błótowskej wsy Myšin. Wšu wjesołosć skazy powěsć, zo chce předewzaćel Diederich Muks groble zamjetać a na tym městnje wulku fabriku natwarić. „Přichod je hinaši, zakónču zastarske žiwjenje“, spěwa Syman Hejduška jako Muks. Wanka (Božena Bjaršec), młoda, zmužita wjesnjanka, jeje přećel Janek (Moritz Häußler) a wjesnjenjo kaž tež wódnomužowa swójba, hadźacy kral z mandźelskej, čert a lutki so počinanju spřećiwja a Błóta zachowaja.

„To bě zaso cyle wosebite wuměłske dožiwjenje“, horještej so Annette Pohl a Adelheid Kschammer ze Strjažowa po předstajenju, kotrež so z furioznym wohnjostrojom zakónči.