Choćebuz (ll/NC). Dźewjeć studentow a studentkow z uniwersity Viadrina w Frankobrodźe nad Wódru je minjeny pjatk na ekskursiji Choćebuske dróhi přeslědźiło. Zaběra z mjeńšinami je dźěl jich studija kulturnych wědomosćow. Zaměr běše, so do žiwjenja Delnjoserbow zanurić. W Serbskim instituće (SI) staj Šyman Blum a Evan Bleakly studowacym w jendźelskej rěči přednošowałoj. Wšako pěstujetej Viadrina a SI hižo dołho dobre styki, kajkež tuchwilu předewšěm docentka Karolin Bredowa dale njese.

Mjeztym bě to hižo druha ekskursija, kotraž studentam Viadriny serbski swět wotkrywa. Wjetšina studentow, kotřiž su do Choćebuza přijěli, njeje němsce rěčała. Někotři pak pochadźeja z druhich słowjanskich krajow. Woni zamóžachu zwisk k jim dotal cuzej słowjanskej rěči wutworić a někotre delnjoserbske słowa rozumić. Wosebje wulki zajim zbudźachu mjez studowacymi serbske nałožki.