Choćebuz (KP/SN). „Cyrkwje su wote­wrjene rumy za wšěch“. Pod tymle hesłom přeprošuja cyrkwje hižo wot lěta 2002 stajnje swjatki w Choćebuzu a w Berlinje na nóc wotewrjenych cyrkwjow. Za to přihotuja w muzejach a cyrkwjach skutkowacy wosebite programy. Zdobom poskićuja ludźom składnosć, rumnosće dožiwić a na so skutkować dać.

Lětušu swjatkownu njedźelu je Spěchowanske towarstwo za serbsku rěč w cyrkwi wospjet serbski program wuhotowało. Na małej žurli ewangelsko-metodistiskeje cyrkwje w Choćebuzu je žónski ansambl Jarobinka pod nawodom Walburgi Wałdźic publikum ze serbskimi spěwami zahorił. Izabela Kałduńska je spěwarki na huslach přewodźała. Z pomocu efektow a loop-station zynki swojeho instrumenta přeměnja a zwoprawdźa tak nimale orchestralny zwuk. Z hudźbu a ze spěwami za film „Pola nas rěka wona Hanka“ su wšitcy zhromadnje publikum zahorili. Nimo toho su wobdźěłane wersije ludowych pěsnjow, kaž na přikład „Steji ta lipa“ a „Hołbik dwě běłej nóžce ma“, w delnjoserbskej rěči a slepjanšćinje zaspěwali.