Budyšin (SN/bn). „Wutrobnje witajće na zazběh pjateje sezony Kulturneje zahrody. Znowa smy pisany program zestajili, z kotrymž předstajimy tři měsacy dołho stajnje sobotu wotměnjawu hudźbu na ‚najrjeńšim balkonje Budyšina‘!“ Z tymile słowami zahaji intendant Serbskeho ludoweho ansambla Tomas Kreibich-Nawka předwčerawšim lětuši rjad koncertow pod hołym njebjom, wotměwacy so runja minjenym lětam na bywšej Budyskej byrgarskej zahrodźe pod Röhrscheidtowej baštu. Prěnju połdekadu zjimajo wón zwěsći, zo je so „po hdys a hdys horbatym puću poradźiło, format etablěrować a publikumej serbskich, němskich a mjezynarodnych wuměłcow wuspěšnje prezentować.“ Zdobom wón přizna, zo so Kulturna zahroda dotal z „čornymi ličbami“ hordźić njemóže. „Ćim bóle dźakuju so našim sponsoram, kotřiž nas swěru a šćedriwje podpěraja, kaž tež barje Sundowner, kotraž je wot spočatka z našim kooperaciskim partnerom“, Kreibich-Nawka zjima.