Na 14 městnach a 22 hrajnišćach wotměje so lětsa wot 24. awgusta do 13. septembra sedmy raz Łužiski festiwal. Cyłkownje je 32 žanry a sparty přesahowacych zarjadowanjow planowanych.

Choćebuz (AK/SN). „Festiwal je jasne wuznaće k mocy wuměłstwa wosrjedź strukturneje změny we Łužicy. Naš nadawk je, stajnje znowa hinaše zhladowanišća a stejnišća wujewjeć – z dźiwadłom, koncertami, rozmołwami, wustajeńcami a literaturu“, intendant Daniel Kühnel minjenu póndźelu na předstajenju lětušeho programa podšmórny. Hesło a „inspiraciske słowo“ lětušeho Łužiskeho festiwala je „geschöpferisch“. Prěni raz spožči so myto Credo. Z nim chce Łužiski festiwal bienalnje wosobinu wuměłstwa abo kultury počesćić. Jako nowej hrajnišći prezentowachu organizatorojo Röderowu žurlu we Wulkich Rědorjecach a Energijowu fabriku w Hórnikecach. Cyłkowny budget wučinja 3,3 miliony eurow, z kotrychž přewostaja něhdźe 90 procentow Zwjazk, Braniborska a Sakska.