Wuměłcy hotuja so na prapremjeru oratorija „Wulkotna woda“

Budyšin/Liberec (SN/MiR). Dźensa za tydźeń je prapremjera oratorija „Wulkotna woda“ z kompozitoriskeho pjera Měrćina Weclicha na teksty Róže Domašcyneje. Wjace hač dwě třećinje zastupnych lisćikow za zarjadowanje w Budyskej Krónje je předatych. Tež za dalše zarjadowanje, njedźelu na samsnym městnje a tydźenjej pozdźišo, njedźelu 27. septembra w Liberecu, su hišće zastupne lisćiki na předań­.

Přichodny tydźeń wotměja so po­slednje proby. Prěni króć powjedźe wuměłska­ nawodnica projekta Judit Kubicec wobdźělenych, do kotrychž słušeja 1. serbska kulturna brigada, rejowanska skupina Serbskeho gymnazija, Serbska komorna filharmonija kaž tež band „Johannes und Die Gerstengarbe“ a „Second Line Combo“ do cyłka. Prěnju zhromadnu probu změja wobdźělnicy srjedu na žurli Serbskeho ludoweho ansambla, kotryž­ je nošer projekta. Wosebje dźakowni su wobdźěleni Załožbje za serbski lud, kotraž wobšěrne předewzaće financielnje zaruča.