We wyšej lize stafla juh Sewjerowuchodneho koparskeho zwjazka je Budissa Budyšin pola Union Sandersdorfa z 1:3 (0:1) přěhrała. Za hosći bě Len-Robin Mende (61.) wrota k 1:2 třělił. Hornjołužiski koparski derby Biskopičanske KT 08 přećiwo FC Hornja Łužica Neugersdorf su hosćo po zastatku 0:2 hišće 4:2 (0:1) dobyli. Krystof Bousa bě w kónčnej fazy derbyja dwoje wrota třělił (84., 85.) a David Halbich jedne (90.+1).

Prěnje koparske mustwo SJ Chrósćicy 1981 tabulku wokrjesneje wyšeje ligi dale nawjeduje. Cyłk šeftrenarja Waldemara Adamowicza doby pola přećiwnika KT Ottendorf-Okrilla z 3:0 (0:0). Wrota třěli­štaj w druhim połčasu Jonas Zynda (73.) a Jan Bogusz (83., 87.). W lisćinje najlěpšich třělcow je Bogusz ze sydom wrotami nětko na druhim městnje. Jenož Florian Meltke wot Zeleno-běłych Bukecy je raz wjace trjechił. Ralbičanscy Sokoljo hrajachu w Korzymju přećiwo cyłkej ST Horni kraj Sprjewja 0:0 a Módro-běli z Kulowa přěhrachu doma 0:1 (0:0) přećiwo nowačkej ligi z Malešec.