Měsačne literarne dopołdnjo, kotrež Němsko-Serbske ludowe dźiwadło (NSLDź) hižo wjele lět poskićuje, je so wčera na česć Jurja Brězana, Jurja Kocha a Bena Budarja wotměło. W Dźiwadle na hrodźe přednjesechu wurězki z jich twórbow.

Budyšin (SN/jp). Jednu njedźelu wob měsac zetkawaja so lubowarjo literatury k zhromadnej snědani a po tym na hodźinku čitanja ze wšelakich twórbow. Wčerawši poskitk běše wosebity wjeršk: W srjedźišću stejachu serbscy spisowaćeljo Beno Budar, Jurij Koch a Jurij Brězan, dokelž bychu měli abo mějachu lětsa wosebity jubilej. Beno Budar by lětsa swoje 80. narodniny woswjećił. Składnostnje jubileja Anna-Maria Brankačkec někotre basnje z repertoira Bena Budarja recitowaše. Nimo toho předstaji něhdźe 60 zajimcam wujimk z jeho knihi „Cowboy Tom abo dyrdomdej ze zaka“. Zamołwita za literarne dopołdnjo, něhdyša dramaturgowka Eveline Günther, je so rozsudźiła, basnički a twórby z poćahom k Budyšinej wupytać, hdźež bě Budar bydlił, prjedy hač do Hornjeho Hajnka přećahny.