Hamburg (dpa/SN). Zwjazkowy hospodarski minister Sigmar Gabriel (SPD) chcył w skupinje G7 zjednoćene industrijne kraje wo němskim modelu energijoweje změny přeswědčić. We wubłuku dźensa a jutře w Hamburgu wotměwa­ceho so energijoweho wjerška G7 chce wón zhromadnje z druhimi energijo­wy­mi ministrami k Sewjernemu morju lećeć a tam nowy park wětrnikow na morju wotewrěć, připowědźi Gabriel me­dijam. Ministrojo chcedźa na swojim zet­kanju rozmyslować, kak móhli so indu­- strijne staty ze swojeje wotwisnosće wot rusk­eho zemskeho płuna wuswo­bodźić. Němska wusměrja so tule wo­sebje na wutwar wobnowjomnych energijow.

Bremen/Berlin (dpa/SN). Po najšpatnišim wólbnym wuslědku minjenych 70 lět za SPD w Bremenje je tamniši mě­šćanosta Jens Böhrnsen wotstupił, přewzawši tak zamołwitosć za přesłapjacy wólbny wuslědk. Kaž wón dźensa zdźěli, ma to zakład personelneho nowozapočatka w stronje być. Po dotalnym wuličenju změje knježaca koalicija SPD a Zelenych w Bremenje přichodnje jenož hišće snadnu wjetšinu mandatow w měšćanskej zhromadźiznje. Dotal knježeštej wobě stronje z dwutřećinowej wjetšinu. Najwjetša dobyćerka wčerawšich wólbow je Lěwica ze 9,2 procentomaj (2011: 5,6). Njemało wjesela so tež w FDP: Ze 6,5 procentami móže­ wona zaso do parlamenta najmjeńšeho zwjazkoweho kraja Němskeje zaćahnyć. Prawicarskokonserwatiwna AfD (5,5%) je wotnětka tohorunja zastupjena. Oficialny wuslědk wočakuja srjedu. Po dotalnym wuličenju ma SPD 32,9 procentow (2011: 38,6), CDU je z 22,6 procentami (2011: 20,4) druha najsylniša mócw Bremenje. Zeleni maja jenož hišće 15,3 procenty (2011: 22,5).

11. meje běchu 1., 2. a 4. ukrainska fronta Schörnerowu wojersku skupinu „Srjedźa“ w Čěskej dopřewinyli. 860 000 wo­jakow poda so do wójnskeho zajeća. Schörner sam ćekny do Tirola, hdźež bu wot Američanow zajaty a Čerwjenej armeji přepodaty. Jako wójnski złóstnik bu k 25 lětam dźěłoweho lěhwa zasudźeny. Po nawróće 1955 do ZRN zapowědźichu jemu jako jeničkemu generalej pensiju. 1957 zasudźichu jeho w Mnichowje k 60 měsacam jastwa.

Na awtodróhu twochnjena kruwa je wčera njedaloko Bielefelda wobchad haćiła. K wěstoće šoferow dyrbješe policija skoćo zatřělić. Wobchad steješe štyri kilometry do wobeju směrow. Dalše ratarjej ćeknjene kruwy popadnychu w lěsu.

Bydlenski připowěšak hromadźe z wobsedźerjom pokradnyłoj staj paduchaj w Nižozemskej. 29lětny wčera w swojim caravanje dźěłaše, jako wonaj wóz na swoje awto připowěsnyštaj. Wobsedźer zawoła na to policiju a swěćeše z kapsnej lampu do před nim jěduceho awta. Jako paduchaj to pytnyštaj, wonaj nastroj wotpowěsnyštaj a ćeknyštaj. Policija zamó jeju zajeć, dokelž bě sej wobsedźer čisło­ awta napisał.