TSV Wachau –

Sokoł Ralbicy/Hórki 1:3 (0:2)

Bolostnu poražku dyrbjachu Sokoljo z Ralbic minjeny kónc tydźenja přećiwo Radworjej poćerpić. Wrotar Christoph Gloxyn rjekny po hrě: „To dźensa ničo njebě, ale to dobre na kopańcy je, zo móžeš hižo přichodny raz zaso reakciju pokazać a přichodnu hru hrajnišćo jako dobyćer wopušćić“. A tak so sobotu we Wachauwje tež sta. Fabian Korjeńk dyrbješe jako nutřkowny škitar wupomhać a Křesćan Bejmak nadběhowaše. Wobaj Pěskečanaj pokazaštaj wulkotny wukon a běštaj dobraj garantaj za dobyće.

W lěću so črije za halu do róžka staja a hraje so bičwolejbul, štož je nimale njezapisany zakoń. Tež pola 1. žónskeho wolejbuloweho mustwa viktorije Worklecy to poprawom přitrjechi. Ale nic lětsa, praji Rejzka Rawšec, hrajerka Worklečanskeho cyłka: „Wjetšina holcow je přez cyłe lěćo jónu wob tydźeń w hali. Trenuja tam hižo trochu na nowych taktikach a snano hišće wažniše, njezhubja z tym začuće za hraće w hali.“ Změna wot pěska wróćo do hale je mjenujcy přeco ze znowanawučenjom na hinaše wuměnjenja zwjazana. Tutón čas chcedźa sej lětsa zalutować.

Prawa přihotowanska faza je so w awgusće zahajiła. Jedna z prěnich prioritow rěka ćělna fitnes. Prawidłowny trening w hali, ćělne zwučowanja doma a hraće bičwolejbula drje su dobre móžnosće sebi swójsku fitnes zdźeržeć, ale dokelž nima kóždy čłowjek jenaku motiwaciju so napinać, je prěni krok do noweje sezony, zo cyłe mustwo wěsty fitnesowy staw docpěje.

Awtor dźensa

Pětr Šołta

Tež hdyž wěsća meteorologojo za přichodne dny zaso přijomne słónčne wjedro: lěćo so pomału, ale wěsće rozžohnuje. Přiwšěm nadźijam so na krasne babylěćo.

Minjenu sobotu rano při schadźenju słónca startowaše we Vysokej Lipje ultrakolesowarske wubědźowanje Bohemian Border Bash Race. Kaž mjeno zarjadowanja hižo přeradźa, podachu so wobdźělnicy na kołojězbu podłu Čěskeje hranicy. To su něhdźe 1 300 kilometrow z něšto přez 24 000 wysokostnymi metrami. Cilowe wrota na samsnym městnje budu so 9. septembra hnydom po chowanju słónca wottwarić. Štóž potajkim pozdźišo přijědźe, njemóže so do oficialneje ciloweje lisćiny zapisać. To budźe někotrych jara mjerzać, tamnym zaso chětro smorže, wšako dźe při tajkich kolesowarskich wubědźowanjach prěnjotnje wo swójske cile a wěsty dyrdomdej. Štóž chce, móže tež tu wobdźělnikam zaso přez internet sćěhować a hladać, štó kelko kilometrow wob dźeń natepta abo najmjenje časa ze sparom přečini.