Łužiske liški Běła Woda – ­ESV Kaufbeuren 5:9 (0:3, 1:1, 4:5)

Po tym zo Łužiske liški hižo playoffs docpěć njemóža, tež motiwacija w poslednich hrach sezony zawěsće pobrachuje. Zestupić wšak lětsa tež wjac njemóža. Jutry­ sobotu pak dachu so wot hosća z Kaufbeurena tak prawje přebić. To paradoksne při tym bě, zo dóstachu sej Kaufbeurenčenjo hakle štwórtk w Kasselu z 3:10 na měcu, dwaj dnjej pozdźišo swjećachu sami tajke kanterowe dobyće. Eric Steffen, wrotar z Běłeje Wody, bě na bo­ku domjacych hišće najlěpši muž. Z tym je hladajo na wukon Hornjołužičanow wšitko prajene. Kapitan Brad Ross njediscipliny w zašłej hrě dla zaso raz pobrachowaše, wot njeho přewza Andrew Clark wulke „C“ za kapitana.

Spočatk měrca swjećeše Frank Ričel­ swoje 50. narodniny. Přeco hišće je Njebjel­čan dotal najwuspěšniši serbski kopar, kiž hraješe w swojej karjerje hłownje w třećej lize. Jurij Bjeńš je so z jubilarom rozmołwjał a jemu tójšto zajimawych prašenjow wo jeho žiwjenju jako kopar stajał.

Knježe Ričelo, móžeće skrótka Waše stacije jako kopar naličić?

F. Ričel: 1977 sym jako dźěćo w Njebjelčicach započał do bula kopać, dźesać lět dołho. Potom dźěch k A-junioram do Bi­skopic. Tam hrajachmy w druhej najwyšej lize w NDR. Jako młodźenc smědźach tehdy pola prěnjeho mustwa počuchać a tu abo tamnu hru we wyšej lize sobu hrać. Wot 1993 do 1995 šnórowach kopački za FC Rudne hory Aue, na to ćehnješe mje wosom lět dołho do Lipska k FC Saksam Lipsk, prjedy hač dach swoju karjeru najprjedy pola Budissy w Budyšinje a naposledk hišće někotre lěta tu doma w Njebjelčicach wuklinčeć.

Potajkim sće najdlěje w třećej lize hrał, trjechi?

F. Ričel: Haj, to trjechi, dohromady jědna­će lět. Tuta je so w běhu lět stajnje zaso přemjenowała.

Ravensburg Towerstars – Łužiske liški Běła Woda 4:2 (1:0, 2:1, 1:1)

Trenar Běłowodźanskich lodohokejowych liškow Chris Straube je w nowinarskej konferency po hrě cyle jasnje narěčał, čehodla su Łužiske liški tež tule hru přěhrali: „Partija běše špihel cyłeje se­zony. Nastupajo chłostanski čas smy na prě­nim městnje tabulki. Dóstanjemy prosće přewjele chłostanjow, tak tež dźensa. Dale woramy přewjele indiwiduelnych zmylkow w defensiwje. To njemó­že nam tež Mac Carruth, najlěpši wrotar cyłeje ligi, pomhać. Runje nětko nic, hdyž nima sam 100 procentow. Tež naš powerplay je špatny. Hladajo na docpěte wrota w powerplayju stejimy na poslednim městnje tabulki. To su surowe statistiki, z kotrymiž je wězo ćežko playoff docpěć. Dźensa mějachmy w druhej třećinje hry wulku šansu z mužom mjenje, wurunanje docpěć, město toho pak dóstachmy přez konter jara bolostne wrota k 1:3. Na to wšitko spytachmy. Wrotar won a zaso nutř a zaso won a zaso nutř. Njenamakachmy pak žadyn puć, hru tola hišće dobyć.“

Byrnjež so nalěćo hišće tak prawje předrěło njeje, stej zyma a z njej tež zymski sport za mnohich najprjedy raz wot­bytej, něwěrno?! Nic cyle: Za přiwisnikow lodohokeja je so wjeršk sezony runje hakle zahajił. W susodnej Čěskej hraja hižo­ rozsudne playoff-hry, w kotrychž su tež wospjet hokejisća z Liberec zastupjeni. Tući wšak běchu sej w zašłych lětach z krasnym, ale přiwšěm efektiwnym lodohokejom prawidłownje městno w kónčnej fazy při wuhraću mištra rezerwowali. Přećiwnik w połfinalu je Sparta z Prahi, kotraž je jako dobyćer regularneje hrajneje doby w playoff-hrach nastupiła. Za horce bitwy pod Ještědom je potajkim posta­rane, bóhdał prawje bórze tež zaso před fanami a z prawej stadionowej atmosferu. Tutu wšak dyrbja tež profijojo w ameriskej NHL parować. Aktualnu sezonu su tam hakle srjedź januara zahajili. Hač do 8. meje móža so mustwa hišće za wobdźělenje w kónčnym kole prócować. „Swjate dny“ a horca faza steja za při­wisnikow „najlěpšeho hokeja swěta“ potajkim hišće před durjemi.