Płastowka (19.08.22)
pjatk, 19. awgusta 2022
spisane wot: Mikławš Krawc
1 nic w nocy, 2 jendźelska stolica, 3 španiske město, 4 drjewo wobdźěłacy rjemjeslnik, 5 ćišćerski produkt, 6 wjes při hrodźišću, 7 „nócny ...“, 8 žónske předmjeno, 9 Kreislauf serbsce (krejny ...)
Marko Grojlich čita w Poršicach
štwórtk, 18. awgusta 2022
spisane wot: Janek Wowčer
Poršicy (SN). Ewangelska wosada w Poršicach planuje jutře, pjatk, 19. awgusta, dwurěčny literarno-hudźbny wječork. Wo tym informuje Mato Krygaŕ. Kaž předsyda Serbskeho ewangelskeho towarstwa dale zdźěli chce w Poršiskej farskej bróžni bywši serbski rozhłosownik Marko Grojlich ze swojich knihow stawiznički kołowokoło Poršic čitać. Wo hudźbny dźěl wječorneho programa postara so Jonathan Witschas. W mjenje Poršiskeje wosady Susanne Tschipke tuž wšitkich zajimowanych wutrobnje přeproša być w 19.30 hodź. w farskej bróžni.
Anja a Karen Weise (wotlěwa) z Budyšina stej sej twórby Budyskeho ...
pjatk, 12. awgusta 2022
spisane wot: Dr. Cordula Ratajczakowa
Anja a Karen Weise (wotlěwa) z Budyšina stej sej twórby Budyskeho grafikarja Ralfa Reimanna (srjedźa) w jeho aktualnej wustajeńcy „Budyšin + hory“ hižo wobhladowałoj. Hač do 19. awgusta maja zajimcy w galeriji Budissin hišće składnosć k tomu, jutře je samo móžno, so tam z wuměłcom rozmołwjeć. Foto: SN/Božena Šimanec
W Drježdźanach wotměwaja tele dny „Palaisowe lěćo“ z ...
pjatk, 29. julija 2022
spisane wot: Serbske Nowiny
W Drježdźanach wotměwaja tele dny „Palaisowe lěćo“ z wuměłsce wobswětlenej architekturu, kaž na přikład tu na Nowym naměsće. Nimo toho wuhotuja mjez druhim sep koncertow – rezidencnaj hudźbnikaj staj lětsa Norwegčanka Anette Askvik a John Blek z Irskeje –, wustajeńcow a dźěłarničkow. Kóžde zarjadowanje je darmotnje přistupne. Foto: Jürgen Männel
We wobłuku 11. dnja rangerow chcedźa Yannik Otto a dalši kolegojo, ...
pjatk, 22. julija 2022
spisane wot: Serbske Nowiny
We wobłuku 11. dnja rangerow chcedźa Yannik Otto a dalši kolegojo, skutkujo runja jemu w biosferowym rezerwaće Hornjołužiska hola a haty, sobotu, 30. julija, zajimcam „prašenja kołowokoło družinoškita“ rozłožić. Nimo toho změja wopytowarjo składnosć, so po wosebitej wustajeńcy „Wo žiwjenju w sćinje“ w Stróžanskim Domje tysac hatow wodźić dać. Foto: Bodo Hering
Přeprošujana słowjansku nóc
štwórtk, 21. julija 2022
spisane wot: Marian Wjeńka
Lipsk. Hudźbu a kulturu z wuchodneje Europy dožiwić móža zajimcy na lětnim swjedźenju słowjanskeje nocy, kotryž wotměje so jutře, pjatk, wot 20 hodź. w Lipšćanskej Moritzbasteiji na Naměsće Kurta Masura. Słowjansku nóc zahaji bandura-kwartet „Lvivjanki“ z Lviva. Na to zanjese chór „Slavia“ kozakske spěwy a ukrainske ludowe pěsnje. Rejwanska skupina „Impuls“ předstaji reje z wuchodneje Europy a tež „Kapela Polska“ přeprošuje wšitkich hosći k zhromadnemu spěwanju tradicionalnych pólskich pěsnjow. Jako wjeršk wotwjedu hudźbnicy kapały „Trio z Ukrainy“ z Waršawy a Kijewa wopytowarjow na hudźbne pućowanje po Pólskej a Ukrainje z folkloru, swójskimi kompozicijemi a słowjanskej diskoteku. Wšitcy zajimcy su tuž jutře w znatej Moritzbasteiji witani.
Wot swěčkow so wobkuzłać dać
srjeda, 20. julija 2022
spisane wot: Marian Wjeńka
Pančicy-Kukow. Štóž chce rjany lětni wječor při swěčkach, hudźbje a z kulinariskimi wosebitosćemi dožiwić, njech njeskomdźi sobotu, 23. julija, wot 19 hodź. zahrodowu nóc w zahrodźe klóštra Marijineje hwězdy w Pančicach-Kukowje. Nimo zahajenja sezony, klóšterskeho swjedźenja a zeloweje njedźele je to jedyn z wjerškow w běhu lěta, kotrež tam organizuja. Prjedy hač do wšelakich wobrazow zestajene wjacore tysac swěčkow zaswěća, poskića na jewišću atraktiwny program ze šlagrom, jazzom, akrobatiku, reju a wohnjowej show. Wjeselić smědźa so wopytowarjo mjez druhim na spěwarku Lenu-Loreen Kürschner, kotraž je jako JeLa S w telewizijnym wusyłanju sćelaka RTL „Deutschland sucht den Superstar“ nazhonjenja zběrała. Dale skutkuja sobu Drježdźanski jazzowy duwo Fokus, rejwanske studio TANZ3 a Drježdźanska artistka Heidi Witopil.
4. lětnik Budyskeje serbskeje zakładneje šule je jedna z ...
pjatk, 08. julija 2022
spisane wot: Janek Wowčer
4. lětnik Budyskeje serbskeje zakładneje šule je jedna z dobyćerskich rjadownjow wubědźowanja dźěćaceho časopisa Płomjo. Wčera pobychu woni z redaktorom Płomjenja Pětrom Šołtu na wjedźenju po Njepilic statoku a podachu so po tym na Reinertec ranch k wobjedu a na zabawu. Šulerki a šulerjo běchu ze swojim filmom k 70. narodninam serbskeho dźěćaceho časopisa cyłodnjowski wulět dobyli. Dalša dobyćerska rjadownja poda so w septembru do srjedźneje Łužicy. Foto: Płomjo/Pětr Šołta
„Što sej na swójbje wosebje wažu“ je prašenje, na kotrež ...
pjatk, 01. julija 2022
spisane wot: Serbske Nowiny
„Što sej na swójbje wosebje wažu“ je prašenje, na kotrež wčera w Budyskim žónskim centrumje wotewrjena wustajeńca „Meine Familie(n)“ z dohromady 65 wobrazami a rysowankami wotmołwja. Přehladka twori zazběh rjadu zarjadowanjow a akcijow, kotrež maja „pokazać, kak rozdźělnje hodźi so hesło ‚swójba‘ rozumić“. Foto: Carmen Schumann
Wjele zboža dobyćerjam
póndźela, 27. junija 2022
spisane wot: Janek Wowčer
Budyšin (SN). Škotowe karty z wobrazami čłonow Serbskeho mustwa, kotrež su Serbske Nowiny minjeny štwórtk wulosowali, běchu jatra woblubowane. Mnozy su so wo nje prócowali a so na akciji SN wobdźělili, wutrobny dźak za to. Prěni třo dóstanu přichodne dny stajnje jedyn kartowy set připósłany, to su Andreja Wałdźina z Pěskec, Florian Matka z Chrósćic a Tadej Krječmar ze Serbskich Pazlic. Redakcija Serbskich Nowin přeje dobyćerjam wjele wjesela z kartami.
