Jako Serbja wokoło lěta 1850 po stach do Ameriki wupućowachu, běchu woni po dźensnišich kriterijach hospodarscy ćěkancy – „Wirtschaftsflüchtlinge“ – štož je w Němskej dźensa hižo wudmo. Bychu-li tehdy w USA azylowe zakonje měli kaž dźensa w Němskej, bychu drje serbskich zapućowarjow zaso wotsunyli.
Ličby ćěkancow, kotřiž Němsku docpěwaja, zdadźa so dramatiske. Wšudźe pytaja za móžnosćemi zaměstnjenja. Wšědne wobrazy nowych migrantow, kotrychž ani kałaty grót ani policisća zadźeržeć njemóža, wobkrućeja, zo drje so połoženje dale přiwótřa.