W Budyšinje čakaštej na volleyballistow ST Marijineje hwězdy sylnej mustwje. Wokrjesny mišter Budyšin- sewjer bě prěni přećiwnik, z kotrymž mějachu so mužojo wokoło kapitana Marka Kowarja rozestajeć. Po tym łakaše na nich MSV Budyšin 04 IV. Pančičenjo pak móžachu z połneho čerpać. Jědnaće sportowcow bě k dispoziciji a chcyše z přećiwnikom mocy měrić.
Budyšin-sewjer – Marijina hwězda 0:2 (21:25, 21:25)
Za ST Marijinu hwězdu započa šestka, kotraž bě hižo na prěnim hrajnym dnju we Wósporku wuspěšna. Jeničce za schorjeneho Metoda Šołtu zaskoči Jurij Bjeńš. A wón ćežki nadawk pře wšu měru wuspěšnje zmištrowa. Přeco zaso zwrěšći Budyski nadběh na jeho sylnym bloku. Tež w nadběhu Pančićenjo přeswědčichu. Přez cyłu sadźbu woni snadnje nawjedowachu. Na kóncu hišće připołožichu a jasnje dobychu.