Chcedźa gremij z wulosowanjom mjez wšěmi abonentami rozšěrić
Budyšin (SN/mb). Prěni raz po nimale dźesać lětach je so wčera popołdnju zaso přirada čitarjow Serbskich Nowin schadźowała. Naměstnik šefredaktora Axel Arlt na stawizny gremija skedźbniwši praješe, zo móhli čitarjo tež „po tutym kanalu kritiske přispomnjenja redakciji“ sposrědkować. Alojs Mikławšk přeješe sej – wosebje hladajo na rozprawy wo sporće – druhdy krótše a aktualniše přinoški. Stefan Šmit namjetowaše redakciji, kóždy dźeń připołdnju na Instagramje na wobsahi aktualneho wudaća pokazować. Wšitcy mějachu wobkedźbowanje wšěch regionow za wažne. Juliana Kaulfürstowa a Hajko Kozel přilubištaj so sobu wo to starać, zo su podawki w Slepjanskich kónčinach a w narańšich Serbach dosć w fokusu dźenika.
