Zamołwity za webstronu zakónči projekt – a zaruča přichod słownika

Budyšin (SN/mb). W impresumje online-słownika „soblex“ je zajimawa rozprawa jako download přistupna, kotruž je Bernhard Baier napisał, kiž ma webstronu na starosći. W přehledźe Baier njedźiwajcy wuspěcha projekta druhim projektnym nošerjam jeho kónc wozjewja, dokelž njejsu přemyslowanja, rěčespytny nawod znowa wobsadźić a ramikowy dokument z lěta 2019 aktualnym wuwićam přiměrić, ke konkretnym wuslědkam wjedli. Nošer projekta „soblex“ su Serbski institut (SI), Załožba za serbski lud, Rěčny centrum Witaj (RCW) a Bernhard Baier. Wón najprjedy zwěsća, zo „buchu prěnjotne zaměry projekta dospołnje zwoprawdźene“. K nim słuša nimo digitalneje integracije słownikow mjez druhim tež přepruwowanje prawopisa.