To a tamne (31.07.19)
Kopate natykane wosobowe awto je policija na awtodróze A 9 w Hornjej Frankskej zadźeržała. Dwuwosobowy wóz bě tak z domjacej nadobu nakładowany, zo šofer lědma hišće něšto widźeše. Samo wokoło płunoweho pedala a borzdźidła bě wšitko połne čapora. Dokelž njeměješe šofer ani jězbnu dowolnosć ani přizjewjenje awta při sebi, dyrbješe awto najprjedy raz stejo wostajić. Čehodla bě wone tak natykane, njeje znate.
Ćeknjeneho kenguruwa su w parku w Chołmje nad Kwětanečanskim jězorom popadnyli. Wobydlerjo běchu jeho póndźelu wuhladali a policiju informowali. Ta prošeše direktora Zhorjelskeho zwěrjenca wo pomoc. Direktor móžeše skoćo z narkozowym kłokom pohłušić, na čož dowjezechu je do zwěrjenca. Policija pyta nětko za jeho wobsedźerjom. Dźeń a wjace ludźi sej dźensa kenguruwy dźerži.
Komuny chcedźa sobu rěčeć
Wojerecy (AK/SN). Z tak mjenowanym zakonjom wo sylnjenju struktury chcedźa Zwjazk a kraje strukturnu změnu w brunicowych rewěrach zawjazujcy spěchować. „Hač do kónca septembra ma naćisk předležeć. Mjeztym je dowothłosowanje ze zwjazkowym hospodarskim ministerstwom zaběžało. Hišće lětsa chcemy zakoń schwalić“, podšmórny społnomócnjeny sakskeho statneho knježerstwa za Łužicu a nawoda wotrjada za natwar a strukturnu změnu dr. Stephan Rohde wčera we Wojerecach. Tam wuradźowaše interministerielny wuběrk za strukturne wuwiće w sakskich brunicowych rewěrach. Zastupnicy Zwjazka, kraja, komunow – mjez druhim Běłeje Wody, Slepoho, Mužakowa, Wojerec, Sprjewineho Doła – kaž tež wokrjesow Budyšin a Zhorjelc, zastupjerjo Regionalneho planowanskeho zwjazka Hornja Łužica-Delnja Šleska, Domowiny a dalšich gremijow běchu wobdźěleni. Hač do 2038, tak dr. Rohde podšmórny, je za Łužicu 2,408 miliardow eurow za změnu struktury k dispoziciji. To su 120,4 miliony eurow wob lěto. Nimo zakonja wo sylnjenju struktury Zwjazk a kraje tež zakoń wo pospěšenym planowanju zaměrnje rozjimuja, rjekny Rohde.
Tójšto ludźi bjez bydlenja
Berlin (dpa/SN). W Němskej nima po nowych trochowanjach něhdźe 650 000 ludźi žane swójske bydlenje. Najwjace z nich bydli w nuzowych kwartěrach. Na dróze žiworić dyrbi něhdźe 48 000 ludźi, kaž nowiny rozprawjeja, poćahujo so na trochowanja dźěłoweho zjednoćenstwa za pomoc bjezdomnym. Mjez bjezdomnymi je tež 375 000 připóznatych požadarjow azyla w přebywarnjach ćěkancow a w prěnich přijimarnjach zwjazkowych krajow.
Inflacija snadnje woteběrała
Kamjenc (dpa/SN). Inflacija w Sakskej je w juliju snadnje woteběrała. Kwota podróšenja wučinja po informacjach statistiskeho krajneho zarjada w Kamjencu 1,6 procentow, w juniju wučinješe wona 1,8 procentow, w meji 1,4 procenty. Jedna z přičin su spadowace płaćizny za radija a telewizory (-1,8 procentow) kaž tež za nastroje k předźěłanju informacijow (-2,7 procentow). Žiwidła a napoje drje su so podróšili, wostachu pak z 1,4 procentami pod měsačnym indeksom.
Hotuja so na festiwal
Dulig žada sej zakładnu rentu do 1. septembra
Berlin (dpa/SN). Sakski krajny předsyda SPD a społnomócnjeny strony za wuchodnu Němsku Martin Dulig žada sej wot zwjazkoweho knježerstwa, zakładnu rentu hišće do 1. septembra wobzamknyć. Hewak je wulka koalicija w Zwjazku wohrožena. „Trjebamy skónčnje přełamk nastupajo zakładnu rentu“, rjekny Dulig wčera w Drježdźanach. „Wot februara wo tym w Zwjazku debatuja. Ničo pak so njehiba. To njemóžeš předewšěm ludźom na wuchodźe Němskeje dlěje rozkłasć. Zwjazkowa kanclerka a CDU dyrbjałoj swoju blokadu skónčnje přewinyć“, Dulig w lisće pisa.
Pytaja dale za motiwom skućićela
Berlin (dpa/SN). Po smjertnym nadpadźe na hłownym dwórnišću w Frankfurće nad Mohanom přepytuja dale motiw podhladneho. 40lětneho, kiž bě wčera wosomlětneho hólca před bližacy so ćah na kolije storčił, chcychu dźensa sudnikej předstajić. Tón ma rozsudźić, hač wostanje podhladny w jastwje. Policija bě muža krótko po njeskutku zajała. 40lětny pochadźa z Eritreje a bydli pječa w Šwicarskej. Skućićel bě tež mać hólca na kolije storčił, ta pak móžeše so ćahej wuwinyć. Hólčec bě nablaku mortwy.
Hrózbny njeskutk je debatu wo wěstoće na dwórnišćach Němskeje zbudźił. Nutřkowny politikar CDU Philipp Amthor rjekny powěsćerni dpa: „Nimo spěšneho pochłostanja skućićela dyrbjeli tež wo wěstotnych naprawach na našich dwórnišćach rěčeć.“ Wobchadny fachowc SPD Martin Burkert kritizowaše njedosahacy dohlad na nastupišćach, nimo toho pobrachuja policisća.
Zwjazkowy nutřkowny minister Horst Seehofer (CSU) chcyše so dźensa wo aktualnym wuwiću wobhonić.
To a tamne (30.07.19)
Raketymjetak su zastojnicy na Baltimorskim lětanišću we wačoku pasažěra namakali. Tón bě raketymjetak jako suweněr z Kuwaita sobu přinjesł. Jako přisłušnik wójska bě wón po swojim zasadźenju na Bliskim wuchodźe na dompuću do Texasa. Kak je swoju „wosebitu dopomnjenku“, kaž sam praji, přez wěstotne kontrole w Kuwaiće dóstał, njeje znate. Zastojnicy ju wězo nablaku sćazachu. Na zbožo raketymjetak wjace njefungowaše.
Na europske mišterstwa w grilowanju 18. awgusta w posaarskim Eppelbornje je so dotal něhdźe 20 mustwow přizjewiło. Teamy dyrbja w třoch kategorijach swoje kmanosće pokazać: w tradicionalnym grilowanju swinjaceho mjasa, w grilowanju ryby a zeleniny a w zhotowjenju desserta – na přikład maja na grilu tykanc pjec. Doba přizjewjenja skónči so zajutřišim, štwórtk.
Městno njeje hižo wohrožene
Genf/Baku (B/SN). UNESCO je cyrkej Jězusoweho naroda w Betlehemje z lisćiny wohroženeho swětoweho herbstwa wzała. Wopodstatnili su to z wuspěšnymi napinanjemi wokoło renowacije Božeho domu. Wona a putniski puć buštej 2012 na lisćinu swětoweho herbstwa sadźenej. Runočasnje hižo tehdy na špatny twarski staw cyrkwje pokazachu. Nětko su třěcha, wonkowna fasada, mozaiki a wrota ponowjene. Cyrkej Jězusoweho naroda w Betlehemje bu pod kejžorom Justinianom (527–565) natwarjena. Poprawne narodne městno Jězusa je po křesćanskich podawiznach dźesać kilometrow južnje Jerusalema a słuša dźensa k palestinskim awtonomnym kónčinam.
Poćehnje do Drježdźan
Łódź zaso po puću
Rom (dpa/SN). Němska pomocna organizacija Sea-Eye je zaso před pobrjohom Libyskeje aktiwna. Łódź „Alan Kurdi“ patruljuje před pobrjohom zapadnje stolicy Tripolisa, rěčnik organizacije zdźěli. Zamołwići w Libyskej wo akciji wědźa. „Alan Kurdi“ je tuchwilu jenička ciwilna wuchowanska łódź w Srjedźnym morju před Libyskej, hdźež howri wobydlerska wójna. Před dnjemi bě so runje tam čołm z migrantami podnurił, a něhdźe 200 z nich so zatepi.
Koordinator wotstupi
Washington (dpa/SN). Dalša personalna změna w knježerstwje prezidenta USA Donalda Trumpa: Koordinator tajnych słužbow Dan Coats swoje zastojnstwo 15. awgusta złoži, Trump wčera twitterowaše. Dotal njewědźa, hač 76lětny Coats dobrowólnje dźe, abo hač je Trump jeho k wotstupej nuzował. Naposledk bě wo tym rěč, zo je wón z Coatsom njespokojom. Toho naslědnik budźe zapósłanc republikanow Jahn Ratcliffe, swěrny přiwisnik Donalda Trumpa.
Smjertne wutřěle na swjedźenju
Mjeztym 41. „Christopher Street Day“ je předwčerawšim, sobotu, ...
Surowizny za lětsa poprawom hižo přetrjebane
Berlin (dpa/SN). Lěsy porubane, rěki zanjerodźene, dalše rostlinske a zwěrjeće družiny wotemrěte: Čłowjestwo je swój lětuši budget přirodnych srědkow z dźensnišim dnjom poprawom hižo přetrjebało, kaž institut Global Footprint Network zwěsća. Tak mjenowany dźeń swětoweho přećeženja je lětsa runje tak kaž hižo loni 29. julij, tři dny prjedy hač w lěće 2017 a šěsć dnjow prjedy hač 2016. Ryzy matematisce přetrjebuje čłowjestwo tuchwilu zemske surowizny 1,75 swětow. Před 20 lětami ležeše dźeń, wot kotrehož bě čłowjestwo nad swojimi poměrami žiwe, hišće w septembru.
