Bjarnat Cyž je na zwjazkowym předsydstwje rjekł, zo by wjac pozitiwnych powěsćow z medijow zhonić chcył. Tuž z pozitiwnym započinam: Je wjele swójbow, kiž swojim dźěćom a wnučkam serbšćinu cyle samozrozumliwje sposrědkuja – ju wšědnje doma rěčo. Tutu rěčnu „substancu“ su strategojo modela 2plus hižo před 20 lětami jako podpěru njeserbowacym dźěćom w šuli zaplanowali. A tam, hdźež su ludźo wot 1950tych lět w swójbje serbować přestali, su sobudźěłaćerjo z rěčneje kupy „katolskeho třiróžka“ jara witani, zo bychu rěč w přeněmčenych kónčinach rewitalizowali. Warnowanje na zwjazkowym předsydstwje, zo njesměmy rěčne połoženje w katolskej kónčinje „romantizować“, je woprawnjene. Hižo na hłownej zhromadźiznje župy „Michał Hórnik“ su sej ludźo žadali podpěru za zwyšenje rěčneho niwowa tež w katolskej kónčinje. My wšitcy dźě so ze „substancy“ katolskeje kupy za cyły lud posłužujemy. Tež redakcija Serbskich Nowin. Marcel Brauman

Na pjasćowanskim turněrje do so bili su wopytowarjo w Schwerinje. Přiwisnicy wjacorych pjasćowanskich klubow z Kiela, Hamburga a Schwerina běchu so do włosow dóstali, dokelž njeběchu z rozsudom sudnikow přezjedni, policija zdźěla. Rozestajenja běchu spočatnje werbalne a skónčnje namócnje wuwjercholichu. Na bijeńcy wobdźěli so tójšto ludźi.

Awstralski zakoń wo socialnych medijach by wjetšina ludźi w Němskej witała. 77 procentow wšěch woprašanych je za to, dźěćom a młodostnym pod 16 lětami přistup k socialnym medijam zakazać. Jenož 13 procentow tajke rjadowanje wotpokazuje. Awstralska chce z nowym zakonjom dźěći a młodostnych před škódnymi wuskutkami škitać, kotrež wužiwanje internetnych medijow ze sobu přinjese. Tež w Němskej je sej wjetšina wěsta, zo socialne medije dźěćom zeškodźa.

Pančicy-Kukow (SN/MkWj). Chětro přewidny bě zajim wobydlerjow w Pančicach-Kukowje za wobydlersku rozmołwu, na kotruž bě krajny rada Budyskeho wokrjesa Udo Witschas (CDU) wčera wječor přeprosył. Runje šěsć ludźi bě do awle zakładneje šule přichwatało.

Wo wjele wjace ludźi sedźeše jim napřećo: Krajny rada bě wjacorych wotrjadnikow sobu přiwjezł. Mjez nimi běchu prěni přirjadowany Jörg Szewczyk, dalša přirjadowana dr. Romy Reinisch a decernentka Kristin Penther. Gmejny zarjadniskeho zwjazka zastupowachu jeje předsyda Stefan Anders a wjesnjanosća Marko Kliman, André Bulank, Markus Kreuz, a Clemens Poldrack.

Krajna rada potwjerdźi, zo ma najebać snadny zajim tajke wobydlerske rozmołwy za wažne a zo chcył tutón format tež z předewzaćelemi regiona nałožować.

Berlin (dpa/SN). Generalny sekretar FDP Bijan Djir-Sarai swoje zastojnstwo złoži. Wón sćehnje z tym konsekwency z afery wokoło dokumenta FDP, kotryž wustup strony z amploweje koalicije nadrobnje planuje. Medije běchu papjeru minjene dny wozjewili. Dokument přinjese nawodnistwo strony do wulkich wuskosćow a zbudźa mjez čłonami strony kritiku. W nim pruwuja scenarije wustupa. Mjeztym je tež zwjazkowy jednaćel FDP Carsten Reymann wotstupił.

Přiměr w dalokej měrje dźerži

Tel Aviv (dpa/SN). Najebać israelski lěta­dłowy nadpad na skład brónjow Hisbollah na juhu Libanona přiměr z milicu dotal w dalokej měrje dźerži. Tuchwilu sej wobdźěleni mjezsobu wumjetuja, zo přiměr ranja. Tež wójsko Libanona, kotrež njeje so dotal na wojowanjach wobdźěliło, Israelej­ ranjenje přiměra wumjetuje. Měsacy trajace mjezsobne wobtřělenje mjez Hisbollah a Israelom pak je nimo. Mjeztym so ciwilisća poněčim nawróćeja.

Milica chce dale wojować