Před 20 lětami we Łužicy wo Formuli 1 sonili

pjatk, 21. awgusta 2020
artikl hódnoćić
(0 )
Wotewrjenje Łužiskeho koła 20. awgusta 2000  Foto: archiw SN Wotewrjenje Łužiskeho koła 20. awgusta 2000 Foto: archiw SN

Dźeń do wulkeho dnja wotewrjenja w awgusće 2000 je jednaćel tehdyšeje zawodoweje a managementoweje towaršnosće „Łužiske koło“ kontakt z Berniejom Ecclestoneom nawjazał. Štó, hdyž nic wony aktiwny Brita, móhł Formulu 1 do małeho Klěśišća w hornjobłótowsko-łužiskim wokrjesu přinjesć, bě sej wón te­hdy myslił. Ecclestone bě swój čas wulki manager Formule 1. Tuž běchu sej wěsći, zo móhła Formula srjedźodobnje tež na Łužiskim kole startować. „Smy w stajnych jednanjach ze zaměrom, wot lěta 2002 wubědźowanja Formule 1 na Łužiskim kole přewjesć, rjekny jednaćel Hans-Jörg Fischer. Tehdy wšak fanojo hišće ze syłami k wubědźowanišćam přichadźachu. Bě to tež wulki čas Michaela Schumachera, kiž zběraše jedyn titul swětoweho mištra po druhim.

Zamołwići Łužiskeho koła so nadźijachu, wubědźowanišćo Hockenheimring w sewjernej Badiskej narunać. Tam dyrbjachu nuznje twarske dźěła přewjesć, zo njebychu zamołwići Formule 1 čaru ze swojeho kalendra šmórnyli.

Tola nadźije Łužiskeho koła so nje­spjelnichu. Jenož dwě lěće po furioznym wotewrjenju ze 100 000 přihladowarjemi dyrbješe Łužiske koło insolwencu přizjewić. Před třomi lětami je pruwowanska towaršnosć DEKRA wubědźowanišćo přewzała, do kotrehož twara w bywšej wuhlowej kónčinje běchu swój čas 120 milionow eurow spěchowanskich srědkow inwestowali. Mjeztym wubědźuja so tam zaso w Němskich turowych mišterstwach. Nimo toho wupruwuje DEKRA tam móžnosće awtonomneho jězdźenja.

„Byrnjež spočatk kamjenjaty był, je na Łužiskim kole mjeztym zaso žiwjenje zaćahnyło“, rjekny braniborski ministerski prezident Dietmar Woidke (SPD) hladajo na wčerawše 20. narodniny Łužiskeho koła. Tež DEKRA a hornjobłótowsko-łužiski wokrjes měnitej, zo wutroba Łužiskeho koła po 20 lětach zaso sylnje bije – jenož bjez Formule 1. dpa

wozjewjene w: Róčnica
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND