Łužiske lodohokejowe liški –

Blue Devils Weiden

4:0 (1:0, 1:0, 2:0)

Łužiske lodohokejowe liški su swoju poslednju testowu hru suwerenje z 4:0 dobyli, prjed hač wone pjatk přećiwo Selbskim wjelkam do noweje sezony DEL 2 startuja.

Partija je so spěšnje zahajiła. Hižo za 15 sekundow bu Jaroslav Hübl prěni raz pruwowany. Liški wukonjachu wjele ćišća a docpěchu tak pola hosći hnydom tři chłostanja za sobu. Prěnja hra z hrajerjom wjac na lodźe wosta njewužiwana, tež prěnja móžnosć pola pjeć přećiwo třom. Tola druhu šansu z dwěmaj hrajerjomaj wjac na lodźe wužichu módro-žołći k nawjedowanju (7.). Po tym hosćo w dalokej měrje wot chłostanskeje ławki preč wostachu a lěpje do hry přińdźechu. Prěni wutřěl, kotryž dyrbješe Jonas Stettmer dźeržeć, zapisa pak so hakle w jědnatej mjeńšinje. Dalše wrota njepadnychu, byrnjež mějachu Běłowodźanscy hišće dwě dobrej móžnosći.