300 lět putniska cyrkej Marije domapytanja w Hejnicach

Cyłkownje 27 něhdyšich čłonow chóra 1. Serbskeje kulturneje brigady je so 1. julija pod nawodom bywšeho chóroweho nawody Friedemanna Böhme na puć do čěskich Hejnic podało. Přičina bě wulka swjedźenska Boža mša składnostnje 300lětneho jubileja putniskeje cyrkwje Marije domapytanja – dźeń, kotryž wšěm w žiwym pomjatku wostanje. Hižo ducy do Hejnic su młodostni w busu zhromadnje spěwać zwučowali. Tam dojěwši je jich nawoda klóštra a farar wosady Pavel Anderš lubje witał. Po krótkej přestawce probowachu bywši brigadnicy w cyrkwi, prjedy hač so při tradicionalnym čěskim wobjedźe posylnichu.