Bosćan NawkaDohromady něhdźe 6,5 miliardow eurow bu dotal oficialnje za to nałožowanych, zo by so zawostajenstwo wudobywanja urana w Sakskej a Durinskej „saněrowało“. Hač do lěta 2045 móhłoj hišće dalšej miliardźe eurow k tomu přińć, štož wučinja potom dosć šwarnu cyłkownu sumu. Hižo wupłaćene wotškódnjenje za z oficialnym připóznaćom na přikład na raka schorjenych sobudźěłaćerjow zawoda Wismut we wobjimje něhdźe miliardy eurow wšak so w njej njejewi – cyle wot toho wothladajo, zo su z njeho jeničce po 1991 potrjecheni (!) „profitowali“. Po trochowanju fachowcow hodźało so z hłubin pod Rudnymi horami dalšich něhdźe 130 000 tonow urana wudobyć, znajmjeńša teoretisce. Čert njeje potajkim jenož we Łužicy přewšo pilny był. Prašenje je jenož, hač měli jemu dalši triumf popřeć. Hinak pak njepóńdźe, chcedźa-li Europska komisija kaž tež někotryžkuli politikar inkluziwnje něhdyšeho ministra za strowotu renesansu jadroweje energije zwoprawdźić a so zdobom do wotwisnosćow njepodać, kajkež import trěbnych surowiznow častodosć wuskutkuje.