Hildesheim/Podstupim (dpa/K/SN). Mjeztym zo so połoženje w druhich dźělach Němskeje po njewšědnych zliwkach wotputa – w Goslarskim wokrjesu su móhli katastrofowy alarm zběhnyć –, so situacija w delnjosakskim Hildesheimje přiwótřa. Rěčnik wohnjoweje wobory rjekny: „Pegel stupa, a to njeje za nas žana dobra powěsć.“ Čim dlěje woda na womačane­ pěskowe měchi tłóči, ćim hubjeńšo to je. W saksko-anhaltskim Wernigerodźe bě rěčna zawěra přeběžała, wuchowanske mocy pak nimaja situaciju za „problematisku“. Pegele wjacorych rěkow poněčim zaso spaduja. Najebać to su mnohe dróhi dale zawrjene.

Braniborskim ratarjam trajneho dešća dla wulke škody hroža. Žitne žně wosebje ćerpja. Zapozdźeja so, a kwalita zorna so pohubjeńša.

Berlin (dpa/K/SN). W afriskim Mali je wčera helikopter typa „Tiger“ tam w nadawku UNO zaměstnjeneje jednotki Zwjazkoweje wobory znjezbožił, při čimž staj wobaj pilotaj žiwjenje přisadźiłoj. Ministerka za zakitowanje Ursula von der Leyen (CDU), kotraž swój dowol w Bayerskej nablaku přetorhny, rjekny: „Podawk mje njesměrnje zrudźa.“

Team ekspertow wójska přičinu nje­zboža na městnje přepytuje. Po zdźělenju měroweje misije Zjednoćenych narodow pokazuja prěnje dopóznaća na techniske zaprajenje. Pilot dalšeho „Tigra“, kiž bě za prěnim lećał, rozprawja, zo je ma­šina nadobo a bjez kóždeho nuzoweho signala doprědka so nachiliła a hnydom na zemju zrazyła, hdźež so zapali.

Staj to zaso prěnjej smjertnej woporaj mjez němskimi wojakami we wukraju wot lěta 2015. Generalny sekretar UNO António Guterres wupraji němskemu wulkopósłancej w New Yorku Christophej Heusgenej swoju sobuželnosć.

Sankcije USA přećiwo Ruskej móhli so tež na němske firmy wuskutkować

Berlin (dpa/SN). Zastaranje Europy z ener­giju móhło nowych sankcijow USA přećiwo Ruskej dla přichodnje wohrožene być. Wo tym je społnomócnjeny zwjazkoweho knježerstwa za Rusku Gernot Erler (SPD) přeswědčeny. „W zakonju steji, zo USA płunowód Nord Stream II wotpokazuja. We woprawdźitosći móhli so sankcije přećiwo kóždejžkuli europsko-ruskej kooperaciji k energetiskemu zastaranju měrić, hač k reparaturam na płunowodach, kotrež zastaranju Europy słuža“, měni Erler w dźensnišim wudaću Neue Osnabrücker Zeitung.

Z pipelinu Nord Stream II chcedźa wot lěta 2019 zemski płun z Ruskeje přez Baltiske morjo direktnje do Němskeje wjesć. Gernot Erler w tym zwisku kritizuje, zo ma knježerstwo USA eksport swójskich energetiskich resursow za najwažniše, zo by dźěłowe městna w kraju zawěsćiło a wonkownu politiku USA zesylniło. Tajki element „America first“ nima w sankcijach, kotrež wšak dyrbjeli so zhromadnje z partnerami wutworić, „definitiwnje ničo pytać“.

Tři dny přećiwo sebi tenis hrać budźetaj sportowcaj w delnjosakskim Twistringenje. Při tym chcetaj Christian Masurenko (49) a Dennis Heitmann (34) nowy swětowy rekord nastajić. Dźensa rano we wosmich staj hrać započałoj a chcetaj njedźelu wječor w šesćich, po 82 hodźinach, skónčić. Jenož někotre mjeńšiny chcetaj sej za jědź, spar a nuznik popřeć. Hra je tež přez livestream w interneće widźeć. Trenar, lěkarjo a fyzioterapeuća ekstremneju sportowcow přewodźeja. Energiju čerpać chcetaj wonaj z poprjancow, poliwki a nudlow. Přihladowarjo maja jeju přidatnje motiwować.

Z kijom za starych ludźi je 23lětny w Berlinje-Kreuzbergu 41lětneho muža přebił. Do toho bě sej pjenjezy wot njeho žadał. Jako so wón spjećowaše, so 23lětny z kijom do njeho da. Jako pěšcy na pomoc přińdźechu, so rubježnik bjez pjenjez zminy. Policisća jeho njedaloko městna njeskutka nańdźechu. A znowa je muž spytał kij zasadźić, zo by so zajeću wobarał – tónraz wšak bjez wuspěcha. Přećiwo njemu přepytuja nětko rubježnistwa dla.