Wobara so kritice
Saarbrücken (dpa/SN). Prezident Zwjazka němskich industrijnych a wikowanskich komorow Eric Schweitzer wobara so wumjetowanjam, zo so hospodarstwo přemało za integraciju ćěkancow angažuje. Migrantow do towaršnosće zarjadować je dołhi proces, rjekny Schweitzer. Jich najwjetši problem su pobrachowace rěčne znajomosće. Přerěznje po dwěmaj lětomaj su ćěkancy kmani, wukubłanje zahajić, wón rjekny.
Racije w turkowskich firmach
Istanbul (dpa/SN). Po zwrěšćenym puču w Turkowskej je policija dźensa w předewzaćach Istanbula racije přewjedła. We wjacorych štwórćach přepyta cyłkownje 44 předewzaćow, zdźěla statna powěsćernja Anadolu. Zamołwići firmow su podhladni, zo maja styki k prědarjej Fethullahej Gülenej w USA. Turkowska ma Gülena za hłowneho winika wojerskeho puča z 15. julija. W zwisku z racijemi pytaja nětko za 120 ludźimi po wšěm kraju.
Wikowar bróni do jastwa?
Julia Jawtukowič (nalěwo) a Lera Nemcowa z Běłoruskeje stej ...
SPD chce dopokazy
Wohenje a wulka woda
Ruske bombowcy startuja z Irana
Moskwa (dpa/SN). Ruska je prěni króć bombowcy, kotrež zamóža dołhe čary lećeć, za wójnu w Syriskej do Irana přepołožiła. Wjacore wojerske mašiny typa Tu-22M3 su wčera z iranskeho zepěranišća Hamadan do směra na Syrisku wotlećeli, kaž ruske zakitowanske ministerstwo zdźěli. Ruska a Iran stej wuskej zwjazkarjej syriskeho knježerstwa a tamniše wójsko wojersce podpěrujetej. Ruske lětadła wot septembra 2015 syriskich zběžkarjow bombarduja. Naposledk běchu wone za to tež z lětanišćow w Ruskej startowali. Z Irana so puć bombowcow do Syriskeje wo 60 procentow skrótši, rozprawjeja medije. Zdalenosć z Hamadana do centralneje Syriskeje je 900 kilometrow.
Minjeny tydźeń zetkaštaj so ruski prezident Wladimir Putin a iranski prezident Hassan Ruhani k wuradźowanjam. Ruhani so při tym po zdźělence Krjemla za to wupraji, zhromadnje z Ruskej wěstotu a stabilitu regiona skrućić.
To a tamne (17.08.16)
Zbožo měło je 182 turistow, kotřiž běchu na dnjowym wulěće w kónčinje grjekskeje kupy Lefkada. Jich wulětniski čołm wosta wosrjedź morja stejo, dokelž bě kapitan do wotjězda zabył jón natankować. Jako motor dźěłać přesta, běchu njedaloko dowoloweje kupy, hdźež kótwicu pušćichu. Na zbožo bě morjo měrne. Tak móžeše pobrjóžna straža čołm do přichodneho přistawa ćahnyć.
Staplowane kaminowe drjewo na ležownosći Kupoweho hotela Hermannswerder móhło hižo bórze Podstupimskich sudnikow zaběrać. Šef hotela Burkhard Scholz je přećiwo žadanju města, zo měł stapl drjewa na swojej ležownosći wotstronić, skóržbu zapodał. Město argumentuje, zo by Scholz za kaminowe drjewo dowolnosć trjebał, dokelž leži hotel w přirodoškitnym pasmje. Wjacore medije mjeztym wo skurilnej zwadźe rozprawjeja.
Turkowscy baptisća wohroženi
Izmir (B/SN). Křesćenjo Turkowskeje witaja kónc wojerskeho puča. To wobkrući tež předsyda ewangelskeho zwjazka baptistow Ertan Çevik w Izmiru. „By-li wojerstwo móc přewzało, by Turkowska w swojim wuwiću znajmjeńša wo dźesać lět wróćo padnyła“, rjekny Çevik. Zwjazkej baptistow w Turkowskej přisłuša pjeć wosadow z 300 sobustawami. Terorowych nadpadow dla steja woni pod škitom policije. 95 procentow z 75 milionow wobydlerjow su muslimojo. Křesćanow je něhdźe 120 000.
Móža cyrkej zaso wužiwać
Damaskus (B/SN). Zničena cyrkej w damaskusu je zwuporjedźana. Kaž Gustava Adolfowy skutk (skutk diaspory EKD) zdźěli, steji cyrkej reformowaneje wosady w křesćanskim dźělu města. Tuta kónčina bu loni jara atakowana. Rakety běchu škodu načinili na třěše a w Božim domje. Gustava Adolfowy skutk je 10 000 eurow za wobnowjenje přewostajił. Wosadny farar Boutros Zaour dźakowaše so za podpěru, prajo: „Tak mamy wobnowjenu, krasnu cyrkej, w kotrejž móžemy našeho Knjeza a Wumóžnika chwalić a sławić – při wšěch ćežkich lětach, kotrež tu přežiwjamy.“
Dotal žanu bilancu njepodali
Sydom mortwych
Baton Rouge (dpa/SN). Ličba smjertnych woporow zapławjenjow w zwjazkowym staće USA Louisiana dla je po informacijach medijow na znajmjeńša sydom rozrostła. Najebać lěpše wjedro woda wjacorych rěkow dale stupa, kaž guwerner John Bel Edwards zdźěli. Zliwki běchu so minjeny pjatk započeli. Wot toho časa su wjace hač 20 000 ludźi ze zapławjenych domow a awtow wuchowali. Po słowach Edwardsa je wulka woda dotal bjez přikłada a „historiska“.
Chorownju bombardowali
Sanaa (dpa/SN). Při nalěće wojerskich lětadłow na chorownju w Jemenje je po informacijach pomocneje organizacije Lěkarjo bjez mjezow znajmjeńša jědnaće ludźi žiwjenje přisadźiło. 19 wosobow so zrani. Spočatnje běchu zamołwići wo 15 smjertnych woporach rozprawjeli. Chorownja je objekt na sewjeru kraja, kotryž pomocne organizacije wobhospodarjeja. Wšitke wopory su ciwilisća, předewšěm žony a dźěći. Nalět přiliča mjezynarodnej aliancy pod nawodom Sawdi-Arabskeje, kotraž tam přećiwo zběž- karskim milicam Huthi wojuje.
Za ćahom ryć započeli
Posledni měd lěta 2016 su dźensa na braniborskim krajnym ...
Z dobrotami zlutniwje wobchadźeć
Budyšin (CS/SN). Zapósłanča CDU w zwjazkowym sejmje Marja Michałkowa bě wčera hósć Budyskeje sekcije hospodarskeje rady CDU, zo by wo swojim dźěle w sejmje rozprawjała a na prašenja wobdźělnikow wotmołwiła. Hospodarska rada CDU ma so za posrědkowarja mjez politiku a hospodarstwom. Marja Michałkowa mjez druhim powědaše, zo bě hakle njedawno ze zwjazkowym strowotniskim ministrom w USA. Tam je so wo digitalizowanju w strowotnistwje kraja wobhoniła. Dokelž kładźe wulku wažnosć na dialog z wobydlerjemi, wěnuje zapósłanča połojcu swojeho dźěłoweho časa dźěłu we wólbnym wokrjesu, połojcu časa je w Berlinje.
Byrnjež so hospodarstwo w Němskej tuchwilu derje wuwiwało a bjezdźěłnosć mała była, je Marja Michałkowa za to, z dobrotami za ludźi zlutniwje wobchadźeć. Wšako maja so tele dobroty tež w špatnych časach dale financować.
