Wjac městnow hač ludźi
„Swobodne městna! Serbske institucije nuznje nowych ludźi pytaja“, rěka nadpismo septemberskeho wusyłanja telewizijneho magacina Wuhladko. Tak pytaja projektnych nawodow, redaktorow, wobdźěłarjow spěchowanskich próstwow abo tak mjenowanych motiwatorow. Ženje hišće njebě potrjeba w serbskich institucijach tak wulka kaž tuchwilu. To zaleži na jednym boku na změnje generacijow. Na druhim boku nastawaja přidatne městna, na přikład w zwisku ze strukturnej změnu. Při tym maja wupisanja zhromadne wuměnjenje: wobknježenje serbskeje rěče. Wuhladko połoženje wobšěrnje wobswětluje.
Dalšej ćežišći magacina budźetej reportaža wo boju přećiwo afriskej swinjacej mrětwje we wokrjesomaj Budyšin a Zhorjelc z pomocu trutow kaž tež přinošk „Idole z interneta“ wo wuspěšnymaj serbskimaj influenceromaj.
Telewizija MDR wusyła Wuhladko jutře, sobotu, w 11.45 hodź. Wospjetowanje w samsnym sćelaku slěduje póndźelu, 5. septembra, w 6.45 hodź. Telewizija RBB pokaza magacin sobotu, 10. septembra, w 13.30 hodź. W mediatece MDR je Wuhladko wot jutřišeho cyłe lěto kóždy čas přistupne.
Łužyca pola Frizow
Třeći dźěl lětnjeje serije telewizijneho magacina Łužyca „Wulěty k narodnym mjeńšinam Němskeje“ wěnuje so Frizam. Moderator Christian Matthée zahaji swoju reportažu z wopytom Nordfriisk Instituuta (Sewjerofriziski institut) w Bredstedće, centralneje wědomostneje institucije za hajenje rěče a kultury mjeńšiny, hdźež podawaja jemu dohlad do stawiznow ludu wot 7. lětstotka. Nimo toho rozprawja Mathée z kupow Föhr a Hamburger Hallig, wo šulskim systemje a wuwučowanju frizišćiny w Schleswigsko-Holsteinskej a wo tamnišim radijowym programje w mjeńšinowej rěči. Wusyłanje wopřijima dale rozmołwy ze zastupnikami Rady Frizow.
Telewizija RBB wusyła magacin sobotu, 20. awgusta, w 13.30 hodź. Wospjetowanje w samsnym sćelaku slěduje srjedu, 24. awgusta, w 2.45 hodź. W mediatece RBB je Łužyca wot zajutřišeho cyłe lěto kóždy čas přistupne.
Wšědna serbska drasta
Hišće před někotrymi lětami postajowachu wone wobraz Łužicy: serbske žony w swojej narodnej drasće. Hač na dźěle, při nakupowanju abo njedźelu na kemšach – wone słušachu samozrozumliwje k wšědnemu dnjej na wsach dwurěčneje Łužicy. Tola dźensa je lědma hišće wuhladaš. Tak je w katolskich wosadach jenož hišće něhdźe 20 žonow, kiž wšědnje serbske chodźa a kotrež su zwjetša w starobje daloko nad 80 lětami, zhladujo na dołhe, častodosć tradanja połne žiwjenje.
Njenapadnje a ćicho dožiwjamy runje kónc lětstotki dołheje doby w serbskich stawiznach. Filmowcaj Pětr a Stefan Symank staj za telewizijny magacin Wuhladko rěčałoj z někotrymi z tutych žonow.
Telewizija MDR wusyła Wuhladko sobotu, 6. awgusta, w 11.45 hodź. Wospjetowanje na samsnym sćelaku slěduje póndźelu, 8. awgusta, w 6.45 hodź. a w telewiziji RBB 13. awgusta w 13.30 hodź. W mediatece MDR je magacin wot jutřišeho cyłe lěto kóždy čas přistupny.
Koparjo a koparka
Julijske wudaće telewizijneho magacina Wuhladko wěnuje so jeničkej temje, kotruž njemało ludźi „najrjeńšu pódlansku wěc“ mjenuja, mjenujcy kopańcy. Přičina je za serbske mustwo „dotal najwuspěšniša europeada. Hišće ženje njeběchu Serbja při koparskich europskich mišterstwach narodnych mjeńšin połfinale docpěli. Njeporaženi zakónčichu předkoło a startowachu jako dobyćerjo skupiny do finalneho koła. Po dobyću štwórćfinala přećiwo Južnym Serbam z Chorwatskeje zdaše so wšitko móžne być. Tola hru přećiwo hosćićelam, Korutanskim Słowjencam, su přěhrali. Na kóncu docpěchu serbscy koparjo 3. městno. Z tym drje bě we Łužicy lědma štó ličił“, kaž MDR informuje. Filmowcy a reporterojo magacina su sportowcow na swojim puću do połfinala přewodźeli, za kulisy pokuknyli a euforiju w Korutanskej runje tak kaž we Łužicy zapopadnyli.
Jězba k mjeńšinam
Junijske wudaće telewizijneho magacina Łužyca wotbłyšćuje prěnju etapu aktualneje jězby moderatora Christiana Mathéeja po Němskej k tu připóznatym narodnym mjeńšinam. W schleswigsko-holsteinskej stolicy Kielu bydli tuchwilnu něhdźe 6 000 přisłušnikow Sintow a Romow. Mjez druhim je Mathée předsydu krajneho zwjazka ludoweje skupiny Mattäusa Weißa wopytał a so z nim wo „na přesćěhanje, wuzamkowanje a potłóčowanje bohatych“, mjeztym wjace hač 600 lět trajacych stawiznach, ale tež wo wjelorakej kulturje Sintow a Romow rozmołwjał.
Nimo toho portretuja wosebity, na „specielnu kulturu a potrjeby“ mjeńšiny wusměrjeny bydlenski projekt „Maro Temm“ w Kielu, hdźež je so moderator mjez druhim mjez młodostnymi wo kubłanskich šansach a wosobinskich anticyganistiskich nazhonjenjach wobhonił. Hudźbny přinošk skupiny Django Forever, kotraž swoje spěwy pod hesłom „gipsy music“ zjima, magacin skulojća.
Kulojta koža
Kónc doby a wužadanje
W srjedźišću mejskeho wudaća telewizijneho magacina Wuhladko stej portretowacy přinošk pod hesłom „Kónc doby – wjesnjanosta z najdlěšim słužbnym časom w Sakskej zastanje“. We wopisowanju sćelaka MDR k tomu rěka: „12. junija 2022 su we wjele gmejnach w Budyskim wokrjesu wólby wjesnjanostow. Tež Franc Brusk so za to zajimuje, ale hižo nic tak kaž dotal. Nimale poł lětstotka, wot 1974, je wón wjesnjanosta we Worklecach. Nětko wjeseli so na zasłuženy wuměnk. Wuhladko je jeho cyły dźeń přewodźało. Zhladujemy z nim na čas do přewróta a po tym a bilancujemy.“
Jutry po jutrach
Z aprylskim wudaćom telewizijneho magacina Łužyca postrowi moderator Christian Mathée přihladowarjow z Dešnjanskeho domizniskeho muzeja. Pod nawodom fachowče Katrin Šwjelineje wuspyta so wón mjez druhim w debjenju jejkow – štož je tam hladajo na „małe jutry“ tež po hłownym swjatku „hišće dowolene“.
Dalšej přinoškaj wěnujetej so Mozaikowej šuli w Picnju, hdźež zahaja spočatk meje znowa wučbu serbšćiny, a dźěłarničce rěčneho projekta Zorja za wožiwjenje delnjoserbšćiny po přikładźe a metodźe „dospołneje imersije“ Arapaho-indiana a profesora za antropologiju a indigene studije na Uniwersiće Montana dr. Neyooxeta Greymorninga.
Nimo toho portretuje Łužyca Helmuta Kurja z Blunja, jednoho z poslednich nałožowarjow tamnišeje serbskeje narěče, a „nawrótnika do Łužicy“ Janka Danneckera.
Telewizija RBB wusyła magacin sobotu, 23. apryla, w 13.30 hodź. Wospjetowanje na samsnym sćelaku slěduje srjedu, 27. apryla, w 2.45 hodź. W medijatece RBB je aprylske wudaće wot jutřišeho cyłe lěto kóždy čas přistupne.
Pomoc a solidarita
„Pomoc za Ukrainu“ je centralna tema aprylskeho wudaća telewizijneho magacina Wuhladko. Mjez druhim rozprawja wo beneficnymaj koncertomaj, wuhotowanymaj wot Towaršnosće za spěchowanje Serbskeho ludoweho ansambla w Budyskej „Krónje“ a předstaja solidaritne akcije w Serbach.
Składnostnje jubileja 70. róčnicy załoženja „jeničkeho serbskeho dźěćaceho časopisa Płomjo/Płomje“ podadźa so telewiznicy „na časowu jězbu a wobswětla, kak je so wobličo periodikuma w běhu lětdźesatkow změniło a wuwiło“. Nimo toho wěnuja so nowej seriji MDR „Straight Outta Crostwitz“ a pokazaja reportažu wo „laborje na kolesach“ FABMobil, za kotruž běchu šulerki a šulerjow serbskeju zakładneju šulow w Chrósćicach a Ralbicach a jich wopyt mobila přewodźeli.
Telewizija MDR wusyła Wuhladko jutře, sobotu, w 11.45 hodź. Wospjetowanje na samsnym sćelaku slěduje póndźelu, 4. apryla, w , 6.45 hodź., telewizija RBB pokaza magacin sobotu, 9. apryla w 13.30 hodź. W mediatece ARD je Wuhladko wot jutřišeho cyłe lěto kóždy čas online přistupne.
Serbja, Ukraina a Ruska
W měrcowskim wusyłanju telewizijneho magacina Łužyca je moderator Christian Mathée z hosćom na Lědach. W tamnišim muzeju pod hołym njebjom rozmołwja so z předsydu Domowiny Dawidom Statnikom. Ćežišći budźetej „pozicija třěšneho zwjazka wójnu na Ukrainje nastupajo“ kaž tež posudźowanje přemóranja serbskich nasćěnowych motiwow w Choćebuzu. Nimo toho pokazaja nowe delnjoserbske hudźbne widejo a dalši wid na 30lětne stawizny Łužycy.
Telewizija RBB wusyła magacin jutře, sobotu, w 13.30 hodź. a wospjetuje jón srjedu, 23. měrca, w 3.05 hodź.
