Budyšin (SN/bn). Serbski ludowy ansambl hotuje so na prapremjeru inscenacije „Dalina – Neuland“. Dwójne předstajenje wopřijima spěwohru „Die Fischerin“ a hudźbnu grotesku „Ptačk architektki“. Prěni, dobru hodźinku dołhi dźěl je z pjera Johanna Wolfganga von Goetheho, zhudźbnjeny wot Emilie Meyer. Partitura, kotruž bě komponistka najskerje w zažnych 1840tych lětach napisała, njebu wozjewjena; jeje wersija za orchester, chór a třoch spěwnych solistow zaklinči potajkim přichodnu sobotu prěni raz na zjawnym jewišću. Druhi, tohorunja dotal njepokazany dźěl je trochu krótši a po formje melodram. Libreto Róže Domašcyneje je Budyski komponist Christian Mietke do notow přełožił. Cyłkowny wuměłstwowy nawod wukonja intendant SLA Tomas Kreibich-Nawka, režiju a dirigentstwo zamołwjejtej Maria Chagina resp. Katharina Dickopf. Jako hosćo agěruja Lisa Trentmann, Martin Enger Holm a Friedo Henken kaž tež Božena Bjaršec. Předstajenja pokazuja so w originalnymaj rěčomaj ze serbskimi a z němskimi nadtitulemi.