Po druhim domjacym wuspěšnym hrajnym dnju dale na 2. městnje

wutora, 10. decembera 2019
artikl hódnoćić
(0 )
Za prěnje wolejbulowe mustwo HZ Pančicy-Worklecy njejsu kiće w domjacej hrě přećiwo rezerwje MSV Budyšina 04 runjewon wysoko wisali. Z třomi jasnymi sadźbowymi dobyćemi bě hra za nje sčasom rozsudźena.  Foto: Konstantin Hrjehor Za prěnje wolejbulowe mustwo HZ Pančicy-Worklecy njejsu kiće w domjacej hrě přećiwo rezerwje MSV Budyšina 04 runjewon wysoko wisali. Z třomi jasnymi sadźbowymi dobyćemi bě hra za nje sčasom rozsudźena. Foto: Konstantin Hrjehor

Wolejbulowa tabulka wobwodneje ligi wuchodneje Sakskeje

1. Doprědka Rózbork 8 24 : 8 21

2. HZ Pančicy-Worklecy  8 22 : 8 20

3. JTVG Koblicy 8 20 : 11 17

4. TSV Kundraćicy  8 16 : 13 14

5. OSC Lubij 8 16 : 14 12

6. ST Kupoj-Nowa Łuka  8 12 : 18 9

7. Ochranowske wolejfantki 7 10 : 15 6

8. Nysa Wolejs  7 5 : 18 4

9. MSV Budyšin 04 II 8 3 : 23 2


HZ Pančicy-Worklecy – MSV Budyšin 04 II 3:0 (25:9, 25:7, 25:8)

Po snadnej poražce na předchadźacym hrajnym dnju přećiwo Kobličankam chcychu wolejbulistki prěnjeho zastupnistwa Hrajneho zjednoćenstwa Pančicy-Worklecy na druhim domjacym hrajnym dnju sezony hišće raz pokazać, zo za­móža tež hinak hrać. Po pilnych přihotach, kaž mazanju pomazkow a rjedźenju hale, dźěše skónčnje na hrajnišćo. Prěni kontrahent dnja bě młode zastupnistwo MSV Budyšina 04 II. Spěšnje so wukristalizowa, zo nochcychu domjace žony ničo připadej přewostajić. A po połsta mjeń­šinach hrajneho časa steješe hižo 3:0 za nje­, a to z jasnymi sadźbowymi dobyćemi 25:9, 25:7 a 25:8.

HZ Pančicy-Worklecy – TSV Kundraćicy 3:0 (25:19, 25:20, 25:20)

Druha partija dnja běše za domjace wo­lej­bulistki wjetše wužadanje: TSV Kundraćicy. Hižo wjacore razy bě so w za­šłosći pokazało, zo móže přećiwnik woprawdźity twjerdy worjech za hrajne zjednoćenstwo być. Samo w pokalnej hrě dyrbjachu so Pančičanki-Worklečanki jemu kłonić. Tuž bě načasu połoženje zwjertnyć. Z elanom a sylnymi nadaćemi dźěchu wone do prěnjeje sadźby, a próca so wudani. Z 25:19 zawěsćichu sej prěni přechod. Tež druhi bě wurunany, a wuslědk rěkaše 25:20.

Do třećeho přechoda rozsudźi so trenar hwězdźičkow-mickow Stephan Mühl za změnu na wonkownej poziciji, a trjechi tak do čorneho. K tomu přińdźechu sylne nadaća, kotrež Kundraćičanki přiběrajcy z koncepta přinjesechu. Poněčim so předwjeselo mjez domjacymi roz­přestrěwaše. Z 25:20 wone tež třeću sadźbu dobychu. Tak bě tež druhi domjacy hrajny dźeń za nje ze šěsć dypkami perfektny.

Wosebitu chłóšćenku smědźa Worklečanske-Pančičanske wolejbulistki 11. januara 2020 dožiwić. To změjetej žonjacej mustwje swój zhromadny domjacy hrajny dźeń. Najprjedy nastupitej dopołdnja druhe zastupnistwo a žónski dorost. Hrać budu we Worklečanskej ćěło­zwučowarni. Popołdnju přizamknje so hrajny dźeń prěnjeho zastupnistwa, kotrež pohosći cyłkaj Doprědka Rózbork a Nysa Wolejs.

Za Hrajne zjednoćenstwo Pančicy-Worklecy zasadźene běchu: Anja Biela, Johanna Fiegler, Christin Opicec, Jennifer Otto, Marina Köhler, Stefanie Köhler, Jana­ Kralec, Lydia Rachelic, Anita Salowskec a Nicole Steglich.

Jennifer Otto a Tereza Wićazowa

wozjewjene w: Sport
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND