Budyšan Elias Kummer z 9. lětnika doby na sportnišću Serbskeho gymnazija Budyšin (SGB) z 309 dypkami lochkoatletiski třibój. Druha najlěpša lochkoatletka bě Sarah Bretšnajderec z Budyšina z 266 dypkami před Xeniu Koberec ze Sernjan z 264 dypkami.
Tradicionalne nazymske wubědźowanje w lochkoatletice njebě tónraz korony dla na Budyskej Młynkec łuce móžne. Tak zwěsćichu mjez wjac hač 400 šulerjemi na ležownosći Serbskeho šulskeho a zetkawanskeho centruma Budyšin najkmańšich sportowcow w běhanju, dalokoskoku, mjetanju bulika a kulostorku. A jenož abiturny schodźenk měješe z wjedrom zbožo.
Lochkoatletiski třibój 12. lětnika doby pola holcow Greta Čórlichec z Kulowa ze 162 dypkami. Slědowaše Fabienne Wjacławkec z Ralbic ze 130 dypkami a třeća najwuspěšniša bě Joelina Taschke z Komorowa ze 118 dypkami. Pola muskeje sparty přesadźi so Paul Säuberlich z Bórka pola Budyšina z 234 dypkami, kotryž wuwojowa sej šesty najlěpši wuslědk šule. Slědowaše dalši aktiwny kopar Steve Schröder z Wulkeje Dubrawy ze 185 dypkami před Antonom Demuthom z Budyšina ze 170 dypkami.