Budyšan Elias Kummer z 9. lětnika je tučasnje najwuspěšniši lochkoatlet Serbskeho gymnazija Budyšin (SGB). Wón bě w nowembrje 2019 sakski mišter w crossowym běhu w mustwowym hódnoćenju a docpě w januarje 2020 wurjadne 2. městno na halowych krajnych mišterstwach w pjećiboju lochkoatletiki. Sportowy wučer SGB Měrko Korjeńk je so z nim rozmołwjał.
Předstaj so prošu čitarjam sportoweje strony Serbskich Nowin.
E. Kummer: Rěkam Elias Kummer a bydlu w Budyšinje. Chodźu do 9. lětnika SGB. Rady sportuju a fotografuju a sym wuchowanski płuwar Budyskeje wodoweje straže. Zhromadnje ze sotromaj a staršimaj často pućujemy a kolesujemy.
Što su Twoje najlubše předmjety w šuli?
E. Kummer: Wězo sport, dale geografija a biologija.
Sy aktiwny lochkoatlet, w kotrym towarstwje?
E. Kummer: Hižo wot lěta 2012 sym sobustaw Wuchodosakskeho lochkoatletiskeho zjednoćenstwa Budyšin, hdźež sym spočatnje dwójce wob tydźeń trenował. Aktualnje činju to tydźensce štyri razy pola swojeje wjelelětneje trenarki Ines Heblack.
Kotre wurjadne rezultaty sy dotal w lochkoatletice docpěł?