Na kulowaty 100ty jubilej běchu sej Radworscy sportowcy zašłu sobotu wosebiteho hosća přeprosyli. Z wulkeho Lipska bě BSG Chemija Lipsk do wsy přichwatała. Mustwo z regionalneje ligi sewjerowuchod hraješe w małym Radworju. Hižo cyły tydźeń mějachu zamołwići ruce połne dźěła, zo bychu tutón wjeršk přihotowali. Jako pjatk poslednje přihoty dokónčichu, bě napjatosć wosebje mjez hrajerjemi pytnyć. Za nich bě to hra žiwjenja. Hišće ženje do toho njejsu přećiwo połprofijam ze štwórteje ligi hrali. Mjena a mjezwoča přećiwnika znaja Radworscy jenož z medijow, jich nětko doma witać směć bě za wšitkich wulka česć. Na pjatkownym treningu spytachu domjacy wosebje defensiwu trenować, zo bychu wuslědk tak niski kaž móžno dźerželi. Wšitkim bě jasne, zo móža jenož zhromadnje a z wulkej wolu žiwjenje přećiwnika wobćežować. Při wšěm pak chcychu hrajerjo kaž tež zamołwići sej tutón dźeń lubić dać, so dobreje nalady nasrěbać a tak jubilej rjenje woswjećić.