Wyši koparski ligist Budissa Budyšin je wrotarja Erika Herrmanna angažował. 20lětny je zrěčenje na jedne lěto podpisał a wróći so z tym na swoje stare skutkowanišćo. 1,97 m wulki wrotar ma wšě kmanosće, zo móhł na kaž tež zwonka hrajnišća wažnu rólu w teamje přewzać.

Za Budissu je to woprawdźe zbožo a sportowsce jónkrótna składnosć, přetož z Erikom Herrmannom přińdźe hrajer do kadra wyšeho ligista, kotryž je hižo w třećej lize w kadrje Dynama Drježdźany skutkował a w najwyšich hrajnych klasach dorosta nazhonjenja zběrał. Prezident towarstwa Sven Johne měni: „Erik nima jenož jara dobre wukubłanje a sportowu kwalitu, ale wón tež naše towarstwo a wokolinu ze swójskeho nazhonjenja znaje. Po přestawce zranjenja dla chcemy nětko šansu wužiwać a jeho sportowsce a čłowjesce do našeho teama zapřijeć. Wjeselimy so, zo wón tutón krok pola nas dźe.“