Pasion Chrystusa na hnujace wašnje pod hołym njebjom předstajili

Chrósćicy (SN/bn). Premjera pasionskeho předstajenja „Sćěhuj mje!“ přiwabi minjeny pjatk něhdźe 650 přihladowarjow na Chróšćansku farsku łuku. Publikum mytowaše wukon dohromady wjace hač 180 sobuskutkowacych z trójnej sławu. W mjenje Chróšćanskeje wosady dźakowaše so farar Měrćin Lukaš Deleńk akteram za dalši, žro křesćanstwa wotbłyšćowacy wjeršk we wobłuku jubileja 800. róčnicy prěnjeho naspomnjenja wsy. W mjenje Domowiny gratulowaše jim předsyda třěšneho zwjazka serbskich towarstwow Dawid Statnik wuzběhnywši, zo sej za „žiwy pomnik narodneho a nabožneho wuznaća wšu chwalbu“ zasłužeja. Cyril Hančik, předsyda Towarstwa Cyrila a Metoda, kotrež je zhromadnje z wosadu ze zarjadowarjom inscenacije, dźakowaše so předewšěm najmłódšim hrajerkam a hrajerjam z wutrobnym „Zapłać Bóh“ za hnujace předstajenje, kotrež „wo hłubokej wěrje swědči“.