Rakecy (SN/bn). Serbske ewangelske Bjesady wuhotowachu minjenu sobotu swoju lětušu dźěłarničku w Rakečanskej farskej bróžni. Ćežišćo swětneho dźěla zarjadowanja tworješe serbskosć w interneće. Superintendent Krystof Rummel powita něhdźe 20 zajimcow a zahaji dźěłarničku z nutrnosću. Wosebje wuzběhny, zo njestej starosć a lubosć samozrozumliwej a zo sej tuž dźakownosć zasłužitej. Ze slědowacym přednoškom pod nadpismom „Serbšćina a serbska kultura w digitalnym swěće – dohlady a pokazki“ sposrědkowa Lubina Malinkowa přehlad aktualnych poskitkow w interneće. Mjez druhim předstaji kanalej „Sorbian music“ a „Serbski TV“, kotrejž spřistupnitej na platformje YouTube aktualnu serbsku hudźbu resp. literaturu. Najlěpšej opciji, so w syći wo Serbach informować, stej po jeje słowach strona sorabicon.de a prezenca studija Lucija. Skedźbniwši nimo toho na stronu Serbskeho ewangelskeho towarstwa wona podšmórny, zo steja tam mjeztym wšitke čisła měsačnika Pomhaj Bóh digitalnje k dispoziciji.