SJ Chrósćicy –

Póst Germanija Budyšin 2:3 (1:1)

Zestawa domjacych: Škoda – Mark, Dźisławk, F. Cyž, Rätze, L. Zahrodnik, Hawš, G. Zahrodnik, Bogusz, Kral, Zahrodnik, Šiman (60. C. Handrik)

Kermušnu njedźelu běše mustwo Póst Germanije Budyšin z hosćom w Chrósćicach. Nazymske wjedro z dešćom a sylnym wětřikom skićeše akteram na hrajnišću ćežke wuměnjenja.

Chróšćenjo mějachu prěnje móžnosće hry a docpěchu samo nawjedowanje. Po dołhej přihrawce wotpołoži Filip Šiman bul Oskarej Hawšej, kotryž hrajny nastroj z 25 metrow wyše wrotarja do saka smokny (16.). Nawjedowanje pak dołho njesteješe. W 24. min. rozsudźi sudnik na jědnatku, po tym, zo bu bul z ruku hraty. Tutón pokutny kop hosćo přez Niklasa Šrama wužichu a hru zaso wurunachu. Duel bě přez mnohe dwuboje charakterizowany a móžnosće běchu na woběmaj stronomaj skerje rědke. Na boku SJC měješe Šiman hišće šansu. Tola jeho třělwa z wótreho kuta wrota misny. Budyšenjo mějachu dobru składnosć po wólnym kopje. Třělwu z 20 metrow pak Jakub Škoda na łatu wotwobara.