Drježdźany (dpa/SN). 807 dźěći a młodostnych dyrbješe so w lěće 2024 zajědojćenja z alkoholom dla w sakskich chorownjach lěkować. To je 8,7 procentow mjenje hač 2023. To potrjechi 444 hólcow a 363 holcow. Tole wuchadźa z informacijow chorobneje kasy DAK a z aktualnych ličbow Sakskeho krajneho zarjada za statistiku.

Ličba zajědojćenjow z alkoholom je w Sakskej bóle spadowała hač po wšej Němskeje. Tam běchu w lěće 2024 8 781 młodostnych zličili, kotřiž běchu so dospołnje wopili. To je 5,3 procenty mjenje hač lěto do toho a zdobom najniša ličba minjenych 25 lět. Drježdźanska uniwersitna chorownja snadnje woteběrace ličby tohorunja wobkedźbuje. Tam pak maja zaćišć, zo je zajědojćenje młodostnych z alkoholom mjeztym intensiwniše hač prjedy. Nimo toho potrjechenych dźensa skerje ambulantnje zastaraja. Jenož we wosebje ćežkich padach a hdyž staršej swoje dźěćo njepřewodźatej, je do chorownje zapokazaja.