EU móže zaso jednać – po tym, zo staj Orbán a Fico swoje weto spušćiłoj

Brüssel (dpa/SN). Europski parlament je nowe sankcije přećiwo Ruskej kaž tež kredit za Ukrainu we wysokosći 90 miliardow eurow schwalił. Dźeń po tym, zo je hišće amtěrowacy madźarski ministerski prezident Viktor Orbán swoju blokadu we wothłosowanju spušćił, je EU wčera wuspěšny wukónc formelnych jednanjow za projektaj wozjewiła. Z tym su nowe sankcije płaćiwe a wupłaćenje podpěry za Ukrainu móže so zahajić.

Hižo wjacore lěta je na Serbskim gymnaziju z wašnjom, zo sej šulerjo z małymi akcijemi něšto pjenjez zasłužeja, z kotrymiž potom swój maturitny bal finan­cuja. Hižo w 11. lětniku z tym započnu. W šuli přewjeduja bazary, na serbskich swjedźenjach pohosćuja wopytowarjow z napojemi a jědźu, na přikład loni na schadźowance za swójby abo na pohodownym hajowaju. Nowu móžnosć, sej rjadownisku kasu tróšku napjelnić, skićachu šulerjam hosćencarjo Budyskeho Wjelbika. Lukašec mandźelskaj běštaj so jich woprašałoj, hač nochcyli wopytowarjam hosćenca z małym programom serbsku kulturu předstajić.

Grünheide/Austin (dpa/SN). Dale a wjetšeho naprašowanja dla chce US-ameriski producent elektroawtow Tesla ličbu dźěłaćerjow w swojej jeničkej europskej tworni w Grünheide pola Berlina krótkodobnje zwyšić. „Hač do kónca junija chcemy něhdźe 1 000 nowych sobudźěłaćerjow přistajić“, praji nawoda zawoda André Thierig a doda: „Z tym chcemy produk­ciju w prěnjej kročeli wo něhdźe 20 procentow zwyšić a tydźensce 6 000 produkowanych awtow docpěć.“

Po tym zo běše awtotwarc Tesla swój zawod Gigafactory Berlin-Braniborska před něhdźe štyrjomi lětami wotewrěł, běše ličba dźěławych spočatnje pospochi na něhdźe 12 400 stupała. Před dwěmaj lětomaj pak poča jich ličba zaso wote­běrać, hač do spočatka 2026 wo dohro­mady 1 700.

Za Teslu je tuchwilna wolijowa kriza skerje žohnowanje. „Ličba přizwolenjow elektriskich awtow je w krajach, do kotrychž dodawamy, w prěnim kwartalu jasnje stupała“, znazorni André Thierig. W aktualnym kwartalu su w Grünheide wjace hač 61 000 jězdźidłow produkowali – to je nowy zawodny rekord.

Dźesać kruchow złota, kotrež běše gmejnski sobudźěłaćer w Bannewitzu loni w oktobrje při syčenju trawy nadešoł, móže sej gmejna zdźeržeć. W šěsć měsacach předpisaneje čakanskeje doby so nichtó přizjewił njebě, kiž by dopokazać móhł, zo jemu wjacore dźesaćitysacy eurow hódny pokład słuša, zdźěli wjesnjanosta gmejny Heiko Wersig.

Princ Harry je Kijewčanow wčera ze swojim njewočakowanym wopytom ­překwapił. Mjez druhim wobdźěli so w ukrainskej stolicy na wěstotnym forumje a zetka so z wobdźělnikami wubědźowanja In­victus Games za zranjenych wójnskich weteranow, kotrehož załožićel wón je. ­Nimo toho wopyta organizaciju za wotstronjenje minow Halo Trust. Princ Harry njeběše w nadawku briti­skeho kralow­skeho domu po puću, ale priwatnje.