Wolfsburg (dpa/SN). Minjeny štwórtk běše so dohladowanska rada koncerna VW we Wolfsburgu schadźowała, zo by wo trěbnych zalutowanjach špatneje hospodarskeje situacije dla wuradźowała. Přećiwo hrožacemu zawrjenju němskich zawodow w Šwikawje, Emdenje, Hannoverje a Neckarsulmje, kaž tež šmórnjenju něhdźe 100 000 dźěłowych městnow běchu sobudźěłaćerjo koncerna VW na stejnišćach po cyłej Němskej protestowali. Tola tež po štwórtkownišim schadźowanju so zamołwići tomu wuprajili njeběchu. W interviewje z nowinu Bild am Sonntag je so nawoda koncerna Oliver Blume kónc tydźenja słowa jimał. Po jeho měnjenju je alternatiwow za zawrjenje zawodow­. Hižo zahajeny lutowanski program w němskich stejnišćach je so jako skutkowny wopokazał a zawodne kóšty wo přerěznje 20 procentow znižił. Pozitiwnje pohódnoća wón wuwiće předanje nowych elektriskich modelow VW. W Europje je němski awtotwarc najwuspěšniši poskićowar elektriskich awtow.

Narodna rada za kontrolu normow swjeći 20. róčnicu swojeho wobstaća

Berlin (dpa/SN). „Špatnje fungowacy stat zežiwja njesměrnje wjele ludźi. Tam, hdźež mamy wjele běrokratiskich procesow, trjebamy žałostnje wjele posudźowarjow a poradźowarjow“, praji Lutz Goebel, nawoda Narodneje rady za kontrolu normow (NKR) w interviewje z němskej powěsćernju dpa. NKR wo­swjeći w awgusće swoju 20. róčnicu załoženja a ma dohromady dźesać čestnohamtskich čłonow. Njewotwisny gremij ekspertow, kotryž je Zwjazkowemu mi­nisterstwu za digitalizaciju a modernizowanje stata (BMDS) přirjadowany, poradźuje zwjazkowe knježerstwo a zasadźuje so za mjenje běrokratije, lěpje fungowace zakonje a digitalne zarjadnistwo. Gremij přepruwuje nowe zakonje hladajo na kóšty kaž tež digitalnu realizaciju procesow a pruwuje alternatiwne móžnosće z wjetšim poćahom k praksy.

Šef VWja Oliver Blume je loni „wopor“ krizy koncerna dla na so wzał a město dźesać „jenož“ sydom milionow eurow dóstał. Wo zasłužbje načolneho managera njetrjebamy hladajo na dezaster awto­twarca rěčeć. Jeho předchadnikej Herbertej Diessej, kotryž je 2022 dočasnje wotešoł, su loni samo dźewjeć milionow za njedźěło płaćili. Nic jenož w Šwikawje steji twornja VW na hračkach, kotrehož dźěłaćerjo su wšě nadawki po planje koncerna spjelnili. 100 000 wohroženych dźěłowych městnow pokazuje na to, zo managerojo a načolne gremije koncerna porjadny job činili njejsu. Mjeztym Blume drje wo „inteligentnišich rozrisanjach“ hač zawrjenju stejnišćow rěči. Štóž pak přistajenych wo bytostnych zawodnych naležnosćach njeinformuje, a město toho z medialnymi pucherjemi njewěstotu šěri, sebje samoho diskwalifikuje. Wliw politiki w koncernje běše přeco hižo wulki – štož dožiwjamy, je tež wuraz zwrěšćeneho planoweho hospodarstwa. Marcel Brauman

Start do předposlednjeho kónca tydźenja WM běše pjatkowniša partija mjez Španiskej a Belgiskej. Tam su přećiwnika za Francozow w poł­finalu wuslědźili. Z defensiwnym wu­směrjenjom belgiskeho mustwa mějachu Španičenjo jako faworića swoju lubu nuzu. W 30. min. pak z pomocu Fabiána prěnje wrota třě­lichu. Belgiska hišće do połčasoweje přestawki z hłójčkowanymi wrotami wot De Ketelaere na 1:1 wuruna. To běchu prěnje přećiwne wrota za španiske mustwo w tutym turněrje. W druhim poł­času poradźichu so Španičanej Mikelej Merinej cyle pozdźe dobyćerske wrota. Po zmylku wrotarja Senne Lammens steješe­ wón na prawym městnje a třěli 2:1. Z tym su Španičenjo dale. Přećiwo Francoskej pak dyrbja swoje wukony jasnje stopnjować.