Marek Krawc piše wo aktualnych temach w Čěskej

Praha. W stadionje w mexiskej Guada­lajarje dominowaše zašły pjatk w rańšich hodźinach čerwjena barba južnokorejskich fanow. A tež na trawniku su ko­rejscy koparjo hru postajowali. Jich přećiwnik, narodne mustwo Čěskeje, pak swoju čerwjenu nitku njenamaka. Hakle po hodźinje mějachu čěscy fanojo skónčnje přičinu so wjeselić. Ladislav Krejčí zhłójčkowa bul po zamjeće Vladimíra Coufala do wrotow a z tym Čěska tutu skerje ćahatu hru skónčnje nawjedowaše. Wjeselo pak traješe jenož wosom mjeńšin, doniž Korejčan In-Beom Hwang kulowatu kožu do čěskich wrotow nje­třěli. We 80. mjeńšinje trjechi tež jeho sobuhrajer­ Hyeon-Gyu Oh. W poslednich mjeńšinach so čěscy koparjo po­darmo wo lěpši wuslědk prócowachu. W 82. mjeńšinje měješe nadběhowar Adam Hložek poslednju šansu – južnokorejski wrotar pak pokaza přewšo dobre refleksy.

Po mnohich sensacijach póndźelnišeho hrajneho dnja swětoweho koparskeho mišterstwa njeje wčerawši dźeń telko skićił. Tři hry stejachu na programje. W prěnjej wo­srjedź nocy steje­štej sej Sawdi-Arabska a Uruguay na­přećo. Uruguay drje lěpje startowaše, přińdźe pak w 41. mjeńšinje po zmylku wrotarskeje legendy Fernanda Muslera k zastatkej. 40lětny Musler třělwu na wrota tak njezbožownje wotwobara, zo móžeše Al-Amri bul we wrotach zaměstnić. W druhim połčasu hraješe uruguayski team kaž wuměnjeny a nadźěła sej wjace šansow. We 80. mjeń­šinje so hrajerjej Maxijej Araujej tola hišće­ wurunanje 1:1 poradźi. To běše zdobom kónčny wuslědk.  

W druhej hrě mjez Iranom a Nowoseelandskej padny na zbožo wjace wrotow. Hrajersce běše hra skerje słaba, ale dźakowano štyrjom wrotam běše za přihladowarja dosć napjata. Hra skónči so njerozsudnje z wuslědkom 2:2.