Yad Vashem přichodnje tež w Sakskej
Lipsk (dpa/SN). Jerusalemske wopomnišćo holocausta Yad Vashem změje w přichodźe nimo w Mnichowje tež w Sakskej wopomnjensku městnosć. W Mnichowje ma nowy kubłanski centrum nastać. Lipsk dóstanje mjeńše wonkowne stejnišćo z interaktiwnje wuhotowanymi kubłanskimi rumnosćemi, kotrež maja so w Domje Ariowitscha zaměstnić. Wobě němskej městnosći stej prěnjej stejnišći Yad Vashem zwonka Israela.
Pod nawodom kultusoweho ministerstwa běše so Sakska wo wopomnjensku městnosć požadała. W dokumenće wuzběhnychu relewancu wopomnišća za politisko-historiske kubłanje w swobodnym staće a potencial za móžne kooperacije z partnerami w Pólskej a Čěskej. Lětsa w februaru su wšitke frakcije w Sakskim krajnym sejmje požadanju přihłosowali. Sakski ministerski prezident Michael Kretschmer (CDU) kaž tež Lipšćanski wyši měšćanosta Burkhard Jung (SPD) wčera wobaj wuzběhnyštaj, zo je rozsud za Lipsk „wulka česć a zdobom zawjazk“.
Nowa alianca w času dwělow
Francoska wozmje Norwegsku pod swój „atomarny škitnik“
Paris/Oslo (dpa/SN). Jako prěni kraj w Europje wozmje Francoska Norwegsku pod swój „atomarny škitnik“. Wotpowědne zakitowanske zrěčenje staj ministerski prezident skandinawiskeho stata Jonas Gahr Støre a francoski prezident Emmanuel Macron zawčerawšim w Parisu podpisałoj. W padźe nadpada na NATO-kraj Norwegsku móhła Francoska potajkim z atomowymi brónjemi přećiwo agresorej postupować.
Hižo dołho Norwegska na tym dwěluje, zo jim USA w nuznym padźe bjez dlijenja pomhaja. „Rozsud je tež konsekwenca tutych dwělow kaž tež wěstotnopolitiskeje situacije w Europje“, potwjerdźi Jonas Gahr Støre srjedu w interviewje z norwegskej powěsćernju NTB. Ruska je při tym, „so masiwnje wobrónić, tež w nuklearnym wobłuku“, wón podšmórny a doda, zo pak nochcedźa sami w Norwegskej atomowe brónje zaměstnić.
Lutz Jungrichter: Molowanje jako žiwjenski eliksěr
Moler Lutz Jungrichter je najebać wysoku starobu nadal jara produktiwny w swojim wuměłskim tworjenju. Dnja 22. junija woswjeći wón swoje 85. narodniny. Molowanje je jemu ze žiwjenskim eliksěrom. Wjetšinu mólbow, kotrež wustaja tuchwilu w personalnej přehladce w Muzeju Budyšin, je wón w zašłych pjeć do dźesać lětach stworił. Minjenu sobotu je Lutz Jungrichter přehladku hromadźe z mnohimi wuměłskimi kolegami, přećelemi a zajimcami wotewrěł. Hosćo běchu wot pisanosće jeho přewažnje z acrylom na płatnje molowanych wobrazow zahorjeni.
To a tamne (29.05.26)
Swětnišćowa raketa „New Glenn“ Jeffa Bezosa, US-ameriskeho załožićela koncerna Amazon je w běhu rutinoweho testa wčera na swětnišćowym dwórnišću Cape Canaveral před planowanym startom rozbuchnyła. Kelko sobudźěłaćerjow bu hoberskeje eksplozije dla zranjenych, dotal znate njeje. Miliardar Bezoz zdźěli, zo přičiny njezboža tuchwilu znate njejsu, zo pak za nimi slědźa.
Dla hroženja z bombu dyrbjachu wčera wječor terminal 2 Berlinskeho lětanišća BER nachwilnje zawrěć. Po tym, zo běše skućićel w něhdźe 21 hodź. telefonisce hrozył, zo je tam bombu schował, policija, wohnjowa wobora a wěstotne mocy BER lětanišćo spěšnje ewakuowachu. Fachowcy za rozbuchadła přepytowachu na to areal, tola ničo njenamakachu. Wobchad lětadłow móžachu najebać hroženja regularnje přewjesć. Identita skućićela dotal znata njeje. Kriminalna policija pak za nim slědźi.
Chemiske brónje w Syriskej
Damaskus (dpa/SN). W Syriskej su po informacijach Organizacije za zakaz chemiskich brónjow (OPCW) mnohe dotal njeznate składy chemiskich brónjow wotkryli. Nowe syriske knježerstwo běše po powalenju wjelelětneho mócnarja Baššāra al-Assada w decembru 2024 připrajiło, zo chce zbytne składy tychle brónjow wotstronić a zamołwitych zasudźić. OPCW bě knježerstwu al-Assada wospjet wužiwanje chemiskich brónjow we wobydlerskej wójnje porokowała. Režim pak bě jich zasadźowanje stajnje prěł.
Njeje za pokročowanje „rabata“
Berlin (dpa). Zwjazkowy wobchadny minister Patrick Schnieder nima podlěšenje tak mjenowaneho tankowanskeho rabata za spomóžne. „Stat přińdźe tež jónu na mjezu swojich móžnosćow“, rjekny politikar CDU w interviewje z nowinu Handelsblatt. Město toho měł sej stat předewšěm wobchad tworow dokładnišo wobhladać a za spěchowanskimi móžnosćemi na tutym sektoru pytać. Předewšěm mjeńše logistiske předewzaća tuchwilu chětro ćerpja.
Ver.di namołwja k stawkam
Wulkeje horcoty z temperaturami nad 30 stopjenjemi w minjenych dnjach ...
Prognozu skorigowali
Cybernadpadw Litawskej
Pistorius na wopyće w Kanadźe
Ottawa (dpa/SN). Ze zaměrom, strategiske wojersko-politiske partnerstwo Němskeje a Kanady rozšěrić, přebywa zwjazkowy zakitowanski minister Boris Pistorius (SPD) tuchwilu w Ottawje. Na nowinarskim terminje we wobłuku wikow za zakitowanje, wěstotu a nowe technologije CANSEC zwurazni wón w kanadiskej stolicy, zo měli so čłonojo NATO hladajo na aktualnje chabłacu poziciju zwjazkarja USA „sami chutnje wo wojerske zesylnjenje prócować. Měli mjenje kedźbnosće tomu wěnować, što druzy činja. Město toho měli so bóle na to fokusěrować, što sami zdokonjeć móžemy“, wón wuzběhny.
Pistorius zetka w Ottawje kanadiskeho premierministra Marka Carneyja kaž tež swojeho kolegu w zastojnstwje Davida McGuintyja. Cyle konkretnje wabi wón w Kanadźe wo kooperaciju na polu brónjenja. Mjez druhim chce Pistorius zrěčenje za dodawanje wojerskich podnurjakow němskeho předewzaća TKMS w Kielu zahibnyć. TKMS je po cyłym swěće najwjetši twarc wojerskich podmórskich łódźow bjez atomoweho ćěrjenja.
Z wjace elanom do wuchoda
Němsko-pólska partnerska syć žada sej spěšniši wutwar železniskich čarow
Poznań (dpa/SN). Zastupjerjo zwjazkowych krajow Braniborska, Sakska, Mecklenburgsko-Předpomorska a Berlin su so wčera k 20. jubilejnemu zetkanju pólsko-němskeje partnerskeje syće ze zastupjerjemi pólskich wojewódstwow Wielkopolskie, Lubuskie, Zachodniopomorskie a Dolnośląskie w Poznanju zešli. Wot lěta 2006 zasadźuje so syć we wobłukach politika, zarjadnistwo, hospodarstwo a ciwilna towaršnosć za sylny a atraktiwny pomjezny region. Na wčerawšim zetkanju dopominachu wobdźělnicy ze zhromadnym apelom zwjazkowe knježerstwo, na spěšniši wutwar němsko-pólskich železniskich zwiskow njezabyć.
