Berlin (dpa/SN). Z wojerskej česću je zwjazkowy kancler Friedrich Merz (CDU) noweho madźarskeho ministerskeho prezidenta Pétera Magyara wčera před kanclerskim zarjadom přijał. Němska je štwórty kraj Europskeje unije, kotryž Magyar po nastupje zastojnstwa spočatk meje wopyta. Prěnjej wukrajnej jězbje běštej jeho do Pólskeje a Awstriskeje wodźěłoj. Minjeny tydźeń poby w Brüsselu, hdźež zeńdźe so z wodźacymi EU-politikarjemi kaž tež ze zastupjerjemi NATO. Zwjazkowy kancler přilubi madźarskemu ministerskemu prezidentej połnu němsku podpěru při tym, Madźarsku „wróćo do­srjedź Europy wjesć“, kaž bě to Magyar po dobyću wólbow připowědźił.

Magyar slubi, zo chce Madźarska „sprawny a spušćomny partner“ w Europje być, přispomni pak tež, zo „njebudźemy wězo přeco jednoho měnjenja“. Na to pokazuje jeho připowědź, zo chce jednanja wo přistupje Ukrainy do EU tak dołho blokować, doniž njeje so prawniska situacija madźarskeje mjeńšiny w Ukrainje polěpšiła.

„Změna strukturow“ je mjeztym kaž swjate słowo, z kotrymž wšě móžne skupiny swoje politiske litanije zwjazuja: Naslědne wuwiće ze sylnej kulturu a hišće sylnišim łahodnym turizmom. Debjenje jejkow za campingowarjow. A nětko zaso stary zajac Šiman wšěm utopijam do kała łazy a něšto wo 10 000 přidatnych dźěłowych městnach w industriji powěda. Utopija, zapřijeće ze starogrjekskeje rěče z woznamom „njeměstno“, je drje pohon za wutrobu, ale nic wuchadźišćo rozumneje hospodarskeje strategije za region. Tradicionelnje je so swójbam derje šło, hdyž jedyn w industriji dźěłaše – hórnistwa dla běchu Wojerecy po přewróće na čole niwowa rentow na wuchodźe Němskeje. Tajki přichod na pinčnika w jězorinje nječaka. Industrijna produkcija twori tež zakład hódnotow za cyłu towaršnosć. Wšako njemóžeš­ z dźěłom profesora sociologije socialnych dźěłaćerjow financować. Tohodla trjebamy wjac ludźi, kotřiž so produkciji wěnuja. Marcel Brauman

Wot minjeneje njedźele do wčerawšeho wotmě so w Zarowje (Bad Saarow) 26. wuchodoněmski hospodarski ­forum. Zastupjerjo z wobłukow wědomosć, hospodarstwo a politika kaž tež towaršnosć wěnowachu so na nim ­prašenju, kotru rólu Němska – wuchod steješe tu wosebje w fokusu – a Europa w globalnym wubědźowanju systemow přichodnje zaběratej.

Bad Saarow (dpa/SN). Na poslednim dnju foruma běštaj zwjazkowy kancler Friedrich Merz a minister za digitali­zaciju Karsten Wildberger (wobaj CDU) z hosćom. W swojej narěči wabješe Merz za wjace konstruktiwneje podpěry hladajo na trěbne ćežke reformy, před kotrymiž Němska steji. „Wšitcy zhromadnje dyrbimy nětko dopokazać, zo smy kmani, problemy w našim kraju rozrisać. To nastupa dźěłowe kolektiwy a předewzaća, zwjazki a dźěłarnistwa runje tak kaž wulke towaršnostne institucije“, wón podšmórny.

Z njewšědnym stuntom je wopity muž minjenu sobotu policistow a pasantow w nutřkownym měsće Koblenza překwapił, jako na motorowu hawbu pomałku jěduceho policajskeho awta skoči a přez třěchu dozady kročo elegantnje zaso z jězdźidła stupi. Krótko po tym jeho zastojnicy w bliskim restawranće pod přikleskom hosći zajachu. Wón bě so prosće za najkrótši puć k cilej rozsudźił, wotmołwi 31lětny na prašenje za přičinu swojeho stunta.

Piwo na Oktoberskim swjedźenju w Mnichowje so tež lětsa zaso podróši. Po informacijach města płaći potom karan chmjeloweje brěčki 14,80 do 15,90 eurow, štož woznamjenja porno lońšemu stopnjowanje wo 2,38 procentow. Płaćizna piwa je kóžde lěto wažna diskusijna tema mjez wopytowarjemi swjedźenja, kotraž so sčasami na politikum rozwiwa.