Zhorjelc (dpa/SN). Šoferojo awtow maja so wot srjedź junija do spočatka nowembra na wobmjezowanja na dźělnej čarje awtodróhi A 4 nastajeć. Dokelž so jězdnja na dołhosći šěsć kilometrow wobnowja, je wot 22. junija w směrje na Drježdźany mjez přizamkomaj Kodersdorf a Wóspork jenož jedna čara swobodna, kaž Towaršnosć za awtodróhi zdźěla.

Nimo toho je tunl pod Limasom wot 22. do 26. junija stajnje mjez 19 a 5 hodź. dospołnje zašlahany. Wobjězdki su wu­pisane.

Tež najězd a wujězd přizamka Šiborćicy w směrje na Drježdźany stej nachwilnje zašlahanej. Najězd ma po planje wot 23. junija do kónca julija zawrjeny być, wujězd samo hač do kónca awgusta. Štóž chce za tónle čas tam wotjěć, móže přizamk Wóspork wužiwać, zo by na napřećiwnu čaru do směra na Zhorjelc přišoł, hdźež móže wotjězd na směr Šiborćicy wužić. Štóž chce po A 4 do směra na Drježdźany jěć, měł wobjězdku 6 hač k přizamkej Wóspork sćěhować. W zwisku z twarskimi dźěłami je nimo toho parkowanišćo Brěznjanski Baršć wot 22. junija do 18. awgusta zawrjene.

Za koparskich fanow po cyłym swěće měješe čakanje na najwjetši podawk kołowokoło kulowateje kože skónčnje kónca. Wčera wječor něšto po 21 hodź. našeho časa startowaše swětowe mišterstwo kopańcy. Po tym zo wotmě so poslednje 2022 w Katarje, wubědźuja so mustwa lětsa w Kanadźe, Mexiku a USA. 23. WM přinjese pak tež někotre nowostki ze sobu. Tak je dotal najwjetši turněr docyła, město dotal 32 narodnych mustwow wuhraje tónraz 48 titul. To woznamjenja cyłkownje 104 hrow w běhu 39 dnjow, kotrež so w 16 stadionach přewjedu. Započeć smědźachu wčera hosćićeljo w sławnym domjacym stadionje Actekow w Mexiko City. Kaž wočakowane so do hry na trawniku tójšto wothrawaše. Mjez druhim wustupi superstar Shakira a předstajichu so wšitcy wobdźělnicy. Bě to jara wjele show, kaž připowědźene. Po tym zo bě hrajnišćo zaso zrumowane móžeše so poprawny highlight wječora zahajić: hra Mexika na Južnu Afriku. Hosćićeljo dźěchu jako faworit do hry a wědźachu tutej róli spěšnje wotpowědować. Mexiko započa z wjele wobsydstwom bula, tempom a wysokim ćišćom na južnoafriske wrota. Wuslědk toho pokaza so hižo w 9. min.

Dokelž je so 65lětna Italčanka sama wo swoje pozdatne prawo postarała, dyrbi nětko na 18 lět do jastwa. Wona je mjenujcy 52lětneho muža, kiž bě ju wobkradnył, přejězdźowała. Jako bě muž žonje w lěće 2024 tošu pokradnył, wona jemu sćěhowa. Jeho dosćahnywši stłóči jeho z awtom na sćěnu. Po tym zjědźe tak často přez njeho, doniž so hižo njehibaše. Na to samo wulěze, pječa zo by zwěsćiła, hač je rubježnik woprawdźe mortwy. Sudnistwo města Lucca w Toskanje žonu mordarstwa dla zasudźi. Wobsedźerka pobrjóžneje kupjele pak smě pokutu w domjacym aresće wotsedźeć.

Belfast (dpa/SN). Po wulce rasistiskich wukročowanjach w Sewjernej Irskej je policija po swójskich wuprajenjach z wodomjetakami přećiwo demonstrantam postupowała. Wona namołwješe pasantow a šoferow jězdźidłow, do předměsta Newtonabbey njejěć, dokelž běchu demonstranća tam pječa cyhele, bleše a kamjenje na zastojnikow mjetali. Hižo wot wutory wječora bědźa so w Belfasće z rasistiskimi krawalemi. Pozadk je nadpad z nožom, kotryž wumjetuja mužej ze Sudana.

Přeliw pječa zaso zawrjeny

Teheran (dpa/SN). USA a Iran staj so druhu nóc za sobu intensiwnje atakowałoj. Tohodla so konflikt zaso sylnje přiwótřa, hačrunjež poprawom hižo dwaj měsacaj dołho přiměr knježił. Wójsko Irana reagowaše na to z dospołnym zawrěćom Hormuskeho přeliwa. Tež w Bahrainje a Kuwaiće běchu na někotre cile třěleli. Wójsko USA na druhim boku dementuje, zo je Hormuski přeliw zawrjeny.

Lěpje před horcotu so škitać