Stupaca ličba ekstremistow
Poćahi z Mercosur-statami skrućić
Zběrka njepočinkow wušła
Marek Krawc rozprawja wo aktualnje rozjimanych temach w Čěskej
Praha. Nochće kusać, pospochi tamać abo wužiwane sudobjo njewotmyte we wopłokowadle stejo wostajić – to su jenož někotre špatne zwučenosće čłowjeka. Tute a dalše „hłupe činki“ našich južnych susodow je Kateřina Šedá w swojej „Narodnej zběrce špatnych zwučenosćow“ wozjewiła. W swojej knize chcyše wuměłča hranicu mjez njepočinkom a złym wotpohladam wuslědźić, tak praji. Hišće wažniši pak je zaměr, ludźi z publikaciju zabawjeć a hromadźe zwjesć. „Myslu sej, zo nas špatne zwučenosće zwjazuja. Wězo nam wone porjadnje čuwy rubja, na druhim boku pak mamy je tež rady“, awtorka wuzběhuje. Po jeje měnjenju nas wone wosebje charakterizuja a wot sobučłowjekow rozeznawaja. Wona sama ma někotružkuli njedobru zwučenosć swojeho partnera jara rady a sama tohorunja perfektna njeje. „W nocy rady šokoladu do so tykam – toho so prosće wzdać nochcu“, Kateřina Šedá přiznawa.
Rozsud w zajimje dźěći
26 milionowza sakske dróhi
Drježdźany (SN). Swobodny stat Sakska chce w lětomaj 2025 a 2026 dohromady 50 milionow eurow do mobility a infrastruktury kraja inwestować. Wužiwanje srědkow z tak mjenowaneho Sakskeho fondsa je sakski kabinet wčera wobkrućił. 26 milionow eurow chce Sakska za wudźeržowanje statnych dróhow nałožować. Dalše 24 milionow eurow je za zjawny wosobowy bliskowobchad, za kolesowarske šćežki kaž tež za železnisku infrastrukturu zaplanowała.
Sakski fonds pjelni so ze srědkow za infrastrukturu a klimowu neutralitu z wosebiteho zamóženstwa Zwjazka, kiž běše zwjazkowy parlament loni wobzamknył. Wot 4,8 miliardow eurow, kotrež je Sakska na dobu dwanaće lět (2025–2036) wot Zwjazka dóstała, móže swobodny stat něhdźe 1,984 miliardow za projekty kraja wužiwać.
Jako „derje inwestowane wosebite zamóženstwo“ wopisuje sakska statna ministerka za infrastrukturu a wuwiće kraja Regina Kraushaar (CDU) tutón inwesticiski plan, kotryž zmóžnja nuznje trěbne ponowjenje dróhow, wutwar kolesowanskich šćežkow a kolijowych zwiskow.
Tež Nižozemska z turněra won
Podobnje kaž němskej je so wčera rano tež nižozemskej koparskej wubrance zešło. Wona dyrbješe mustwo z Marokka porazyć, zo by dale do přichodneho koła přišła. We wurunanym duelu so tempo hry hakle na kóncu druheho połčasa pospěši. Cody Gakpo třěli w 72. mjeńšinje wrota za Nižozemjanow. Team z Marokka dyrbješe nětko reagować. Tež w tutej hrě padnychu wurunanske wrota pozdźe, a to w 91. mjeńšinje přez Marokkočana Issa Diopa. W podlěšenju měješe Marokko šansu hru rozsudźić, tola zwrěšći na nižozemskim wrotarju Bart Verbruggenje. Tak dyrbještej mustwje tež tutu hru z třělenjom jědnatkow rozsudźić. Te je Marokko na kóncu 3:2 dobyło.
To a tamne (01.07.26)
Bywši bunker Hitlera w Berlinskim měšćanskim dźělu Mitte chce tamniši senat bórze wotstronić. Na arealu bunkera maja nowe bydlenske domy nastać. Pomnikoškitarjo přećiwo planam protestuja, dokelž by so z tym posledni hišće eksistowacy bunker Hitlera z dowójnskeho časa zhubił. Wón pak nima status pomnika, štož je hladajo na jeho zachowanje problematiske.
Z Oscarom wuznamjenjeny dokumentarny filmowc Pawel Talankin je so njemało stróžił, jako po swojim lěće wot New Yorka do Frankfurta n. M. zhoni, zo je lětanska towaršnosć Lufthansa pozłoćenu trofeju „zhubiła“. Při wotlěće njeběchu jemu dowolili, zo ju sobu do kabiny wozmje. Město toho dyrbješe „swojeho Oscara“ jako wačok deklarować a wotedać. Mjeztym je jeho Lufthansa zaso našła. Hdźe, to přeradźić nochce.
Ministrej tójšto domjacych nadawkow dali
Radworska skupina CDU je wčera sakskeho ministra za nutřkowne naležnosće Armina Schustera (CDU) witała. Hłowna tema rozmołwy bě wěstota wšelakich wobłukow, za čož je minister w swobodnym staće zamołwity.
Radwor (SN/BŠe). „Poprawom nima nichtó přičinu skoržić“, zwurazni sakski nutřkowny minister Armin Schuster (CDU) wčera na rozmołwnym kole w Radworskej wohnjowej woborje. Sakske knježerstwo je tójšto do wohnjoškita inwestowało. Ze spěchowanskich programow je tež Radworska gmejna čerpała a sej loni dwě nowej wobornej jězdźidle kupiła. Hladajo na přiběracy problem lěsnych wohenjow w kónčinje wokoło Gohrischskeje hole su prěnje wuspěchi spóznać. W běhu třoch dnjow móžachu tam wudyrjeny woheń zhašeć a to dźakowano nowej technice, Schuster situaciju wopisowaše.
Tež wo kontrolach na mjezach Čěskeje a Pólskeje přitomni wčera diskutowachu. Zamołwity předewzaća zwurazni swoje wobmyslenja, hač su wone dale w dotalnej měrje trěbne. Wjele dźěłaćerjow z Pólskeje přichadźa do Sakskeje na dźěło. Jim su kontrole wobćeženje.
Miliarda přidatnych dochodow
Berlin (dpa/SN). Ze swojich podźělow na předewzaćach je Zwjazk loni cyłkowny dobytk we wobjimje něhdźe 1,1 miliardy eurow měł. To wuńdźe z wotmołwy zwjazkoweho financneho ministerstwa na naprašowanje Lěwicy. Najwjace dochodow přińdźe z podźělow na Němskej Telekom. W etatowym lěće 2025 bě Zwjazk dohromady na dźewjeć předewzaćach wobdźěleny.
W Monacu bomba rozbuchnyła
Monaco (dpa/SN). Z wulkej detonaciju je wčera wječor před zachodom bydlenskeho domu w Monacu bomba rozbuchnyła a tři wosoby chutnje zraniła. Po informacijach tamnišich zamołwitych zarjadow je mjez nimi jedyn z najbohatšich předewzaćelow Ukrainy. Hač běše eksplozija planowany atentat na njeho, to nochcychu wobkrućić. Widejo wěstotneje kamery pokaza w času krótko do eksplozije muža, kotryž nachribjetnik blisko duri wotstaji.
Iran pomoc Europy wotpokazuje
