Hdyž sym dotal zahrodu klóštra Marijina hwězda w Pančicach-Kukowje wopytał, bě to zwjetša kusk ze stresom zwjazane. Druhdy dyrbjach so při zachodźe nastupić, potom znowa čakać, zo móhł sej napoj kupić a skónčnje dyrbjach po zahrodźe nóžkujo kedźbować, zo nikomu na nohu njestupju. Wčera bě wšitko hinak. Ličba wopytowarjow premjerneho zarjadowanja noweho rjada „Kultura a kulinarika“ Křesćansko-socialneho kubłanskeho skutka bě přehladna, hudźba přijomnje cunja, rozmołwy měrne a bjez wołanja a na pućikach žanažkuli tołkańca. Hdyž móžeš při tym hišće něšto słódneho wupić a zjěsć, potom je wječor runjewon perfektny a dožiwiš klóštersku zahrodu cyle hinak, hačrunjež sy žno často w njej był. Tajki wječor dušu čłowjeka hrěje a njemóžu tuž hinak hač organizatoram ze Sonju Hejdušcynej na čole wulki kompliment wuprajić, zo su hosćom ze swojim dźěłom njezapomnite hodźinki wobradźili. Za to wulki dźak! Marian Wjeńka

Podstupim (dpa/SN). Zwjazkowa policija je wčera w Podstupimje swoju rozprawu lěta 2025 zjawnosći předstajiła. Ličba deliktow z namocu na dwórnišćach a druhich zjawnych městnosćach je porno předlětu wo 4,2 procentaj na něhdźe 35 400 padow stupała. Tež nadpadow na zastojnikow Zwjazkoweje policije bě loni wjac hač 2024, a to wo 7,4 procenty. Při cyłkownje 3 185 nadpadach bu dohromady 818 zastojnikow zranjenych. Wot 16. septembra 2024 přewjeduje Zwjazkowa policija namjezne kontrole při wšitkich namjeznych přechodach. W meji 2025 su zastojnicy namjezne kontrole intensiwěrowali.­ Wot tutoho časa woni azyl pytacych – nimo chorych a samodruhe žony – tež wotpokazuja.

„Pjata hwězda“ rěkaše misija, kotruž je němske narodne mustwo w lětach 2018, 2022 a 2026 na swětowym mišterstwje w kopańcy spjelnić chcyło. Stajnje zaso pak dyrbješe tónle zaměr přesunyć. Po hrě přećiwo Španiskej w štwórćfinalu europskeho mišterstwa 2024 rjekny trenar Julian Nagelsmann: „Boli nas, zo dyrbimy nětko dwě lěće čakać, doniž so ze swětowym mištrom njestanjemy“. Nó, z toho nažel ničo njebu, kaž nětko wěmy! Zo Nagelsmann po słabym wukonje němskeho mustwa swoje zastojnstwo dale wukonjeć njesmě, bě jasne. Poprawom chcyše wšak dale činić, tola Němski koparski zwjazk (DFB) je so za nowy započatk rozsudźił. Wobě stronje stej so mjenje abo bóle na wotstup dojednałoj. Z tym je DFB zawěsće něšto pjenjez zalutował – a te nětko trjeba. Wšako su so hižo za noweho trenarja rozsudźili, kotryž runjewon tuni njebudźe. Aktualnje ma wón hišće zrěčenje z koncernom Red Bull. Wo kim rěču? Mustwa Mainz 05, Borussia Dortmund a naposledk wulki FC Liverpool je hižo trenował: Jürgen Klopp. Na njeho a na sportoweho direktora Rudija Völlera čaka wjele nadawkow.

K jatbje na čas žiwjenja je Berlinske krajne sudnistwo wčera paliatiwneho lěkarja zasudźiło, kotryž bě mjez 2021 a 2024 dohromady­ 15 pacientow na swojich domjacych wopytach morił. Nawjedowaca sudnica wuzběhny wosebje hrózbny fakt: 41lětny němski staćan njeje na smjerć chorym ludźom ćerpjenje wolóžić chcył – jeho motiwacija bě nutřkowne spokojenje, kotrež při morjenju začuwaše.

Jimi Blue Ochsenknecht dyrbi njezapłaćeneje zličbowanki w tirolskim hotelu dla znowa před sudnistwo. Zličbowanku we wobjimje 14 000 eurow z lěta 2021 je wón loni, po tym zo bu zajaty, zapłaćił. Z po­kutu běše krajne sudnistwo w Innsbrucku pad ćežkeho wobšudnistwa poprawom loni zakónčiło. Statne rěčnistwo pak je wuspěšnje přećiwo wusudej na powołanskim sudnistwje skoržiło, tak zo proces přećiwo Ochsenknechtej dale dźe.