Wiesbaden (dpa/SN). Deficit komunalnych kasow Němskeje je loni dale rozrostł. Cyłkownu sumu, kotraž w etatach Zwjazka, krajow, gmejnow a socialnych zawěsćernjow pobrachuje, wobliča fachowcy mjeztym na 127,3 miliardy eurow, Zwjazkowy statistiski zarjad we Wiesbadenje zdźěla.

Z tym bě deficit financowanja wo 22,9 miliardow eurow wyši hač 2024 a docpě nimale dokładnje niwow lěta energijoweje krizy 2022.

Hinak hač 2022, jako bě jenož zwjazkowy etat w minusu, rozdźěli so deficit 2025 na wšitke statne runiny. Tuž smě so wočakować, zo so tole tež na zadołženje Němskeje negatiwnje wuskutkuje. Lěta 2022 bě tomu hinak, dokelž je němski stat w prěnim lěće wójny w Ukrainje najebać tehdyše nuzowe połoženje mjenje kreditow wzał hač bě planowane.

Z cyłkownje 31,9 miliardami eurow bě minus pola komunow loni tak wulki kaž hišće nihdy po znowazjednoćenju 1990. Deficit Zwjazka je samsny čas wo dobrej dwě třećinje na 85,4 miliardy eurow rozrostł. Zawinowali su deficit nowe kredity na dobro zakitowanja, infrastruktury a škit klimy.

Štyrjo astronawća swětnišćoweje měsačkoweje misije Artemis 2 su po puću domoj. Ze swojej kapslu Orion su mjeztym dypk docpěli, hdźež je grawitacija zemje sylniša hač měsačka. W nocy na sobotu ma wobsadka w Pacifiskim oceanje přizemić. Po wjace hač 50 lětach su to prěni astronawća, kotřiž su njedaloko měsačka pobyli. Minjeny štwórtk běchu wotlećeli.

Domjace nadawki w swojej dotalnej formje su po měnjenju zwjazka wučerjow Němskeje wohrožene. Přičina je kumštna inteligenca (KI), kotruž šulerjo dźeń a časćišo wužiwaja. Tež wobšěrniše dźěła we wučbje su přiběrajcy potrjechene. Přichodnje dyrbja so šulerjow dokładnišo prašeć, kak su nadawki spjelnili. Zwonka šule hodźi so mjeztym wšitko z KI zrjadować. Jedna móžnosć je, sej ­zaso ru­kopisne dźěła šulerjow žadać, zo bychu jebanstwu zadźěwali.

Paris (B/SN). Ekumeniskeho patriarcha Bartholomaiosa I. su jako naslědnika Benedikta XVI. za asociěrowaneho čłona do Francoskeje akademije moralnych a politiskich wědomosćow swjatočnje přiwzali. Grjeksko-ortodoksny patriarch a čestny předsyda swětoweje ortodoksije je spirituelnu zwjazanosć Konstantinopela ze starym a nowym Romom w swojej dźaknej narěči wuzběhnył.

Wo žiwjenju přemyslować

Saarbrücken (B/SN). Dušepastyr w Trierskim jastwje, farar Michael Müller měni, zo njejsu temy kaž nakazanje, wobžarowanje a wodaće jenož jutry, ale stajnje prezentne. Jeći su najsprawniši kemšerjo. Jeli so jim něšto njelubi, da to hnydom praja. Jeći pytnu, „zo pak tež póstny čas jich najbóle pohonjuje, wo swójskim žiwjenju přemyslować“.

Křesćansko-islamski dialog