Biskopja swěta jednohłósni
Bonn (B/SN). Prěni raz proša biskopske konferency G7-statow w zhromadnym wozjewjenju swojich statnych a knježerstwowych šefow, „mosty twarić za měr, sprawnosć a čłowječu dostojnosć“. Předsyda Němskeje biskopskeje konferency, bidkop Heiner Wilmer, potwjerdźi: „Trjebamy po cyłym swěće humanitarnu změnu, kotraž čłowjeka do srjedźišća staji.“ Nawodźa biskopskich konferencow žadaja sej wjace zasadźenja přećiwo hłodej a chudobje.
Nan třoch dźěći katolski duchowny
Köln (B/SN). Christian Gawenda je 34 lět jako diakon skutkował. Po smjerći mandźelskeje dósta wón wot kardinala Rainera Marije Woelkija měšnisku swjećiznu, rozprawja Kölnske Domradio. Wjele lět je wón tołmačił za přesydlencow w pólskej a ruskej rěči. W septembrje přewozmje nowoměšnik, nan třoch dźěći a dźěd w dušepastyrskim teamje pastoralne nadawki.
Postrow w katalanšćinje
Wjace hač 1000 inficěrowanych
Kinshasa/Bunia (dpa/SN). Něhdźe měsac po tym, zo je w Demokratiskej republice Kongo ebola wudyriła, je ličba inficěrowanych na něhdźe 1 000 rozrostła. Wot inficěrowanych w třoch prowincach su 254 zemrěli, 100 je so wustrowiło. Tuchwilu lěkuja 365 schorjenych, zdźěli ministerstwo za informacije. Kwota smjertnych padow wučinja tuchwilu 25 procentow.
Swobodni Saksojo so wobaraja
Aue-Bad Schlema (dpa/SN). Po tym zo bě Marcus Hoffmann jako kandidat CDU wólby wo zastojnstwo wyšeho měšćanosty w Aue-Bad Schlema dobył, so Swobodni Saksojo tomu nětko wobaraja. We wideju, kotrež strona w socialnych syćach šěri, napřećiwny kandidat Hoffmanna Stefan Hartung a předsyda strony Martin Kohlmann tole wozjewjataj. W 15 stron wopřijacym lisće mjenuje Kohlmann w zwisku z wólbami fakty, kotrež pječa zakonjam njewotpowěduja.
Kliniki lutowanje njeznjesu
Britiski premierminister Keir Starmer je dźensa dopołdnja ...
Debata hižo do wozjewjenja
Komisija za rentu swoje namjety jutře oficialnje předstaji
Berlin (dpa/SN). Hižo prjedy hač komisija za rentu, kotruž bě zwjazkowe knježerstwo wutworiło, swoje wuslědki jutře oficialnje předstaji, je diskusija wo planach wulka. Lěwica a dźěłarnistwa su swoju kritiku na dypkach zwuraznili, kiž buchu kónc tydźenja znate. Dźensa chce komisija swoje wuradźowanja zakónčić. Swoje namjety chcedźa fachowcy potom jutře, wutoru, oficialnje zwjazkowemu knježerstwu přepodać.
Najwažniše namjety su: Z nowej kapitalnej rentu ma so niwow renty dołhodobnje zawěsćić a starobu, w kotrejž smědźa ludźo na wuměnk hić, chcyli w běhu přichodnych lět zwyšić. Nimo toho sej eksperća žadaja, zo měła politika wuměnk z połnej rentu po 45 lětach dźěła wotstronić. Tež samostatni a politikarjo maja w přichodźe do zakonskeje rentoweje kasy płaćić.
Dobra ideja
Deniz Undav hru zwjertnył
Je němske mustwo na swětowym mišterstwje swoju bywšu sylnosć wróćo zdobyło? Po druhej skupinskej hrě sobotu přećiwo wubrance Słonowinoweho pobrjoha je jědnatka DFB pola někotrych fanow skónčnje zaso nadźiju zbudźiła. Jedne je wěste: Němska je nětko hižo za KO-fazu kwalifikowana, a wot 2014 je skónčnje zaso raz předkoło swětoweho mišterstwa přetrała. Tola hra njeje cyle po planje wotběžała. Po tym zo běchu wrota Němskeje foula dla njepłaćiwe, docpě prěnje wrota mustwo z Afriki. Franck Kessié móžeše swoju třělwu w kašćiku Manuela Neuera zaměstnić. Z wuwzaćom dalšich njepłaćiwych wrotow njeje němske mustwo hač do přestawki ničo zdokonjało. Po tym zo jědnatka Juliana Nagelsmanna w druhim přechodźe něšto mjeńšin trjebaše, zo by so do hry namakała, zaměni zwjazkowy trenar mjez druhim Deniza Undava. Wón spožči hrě nowy pohon, a trjechi we 68. min. k wurunanju 1:1. Němska tłóčeše nětko na dobyćerske wrota, kotrež w 90. + 4 skónčnje tež docpěchu. Zaso bě to Undav, kiž bul do wrotow prasny. Hra bě so zwjertnyła, mustwo DFB je skónčnje zaso raz dale!
Wuslědki hrow kónca tydźenja:
Nowe wrota
To a tamne (22.06.26)
30 šlinkow je jedna žona druhej w Zhorjelcu zwady dla do wysokich hrjadkow połožiła. Škódniki, kotrež lubowarjo pyšnych zahrodkow a plahowarjo čerstweje zeleniny scyła wučuć njemóža, su w hrjadkach kwětki a zeleninu nakusali a naparachu tak škodu 20 eurow. Policija dyrbi so nětko z padom zaběrać, dokelž je poškodźena njekmanicu wěcneho wobškodźenja dla wobskoržiła.
Najkrótši dźeń lěta woswjeća ludźo w awstralskim Hobarće na cyle wosebite wašnje: nazy. Na wšěch 3 000 ludźi je so tež lětsa zaso na tak mjenowanym Dark-Mofo-Solistice-Swim wobdźěliło. Při wonkownej temperaturje wokoło štyrjoch stopjenjow a dwanaće stopjenjow we wodźe dyrbjachu wobdźělnicy při skoku do rěki Derwent chětro zmužići być. Najstarša mjez nimi drje bě 96lětna, kotraž hižo wjele lět sobu płuwa.
Wšitcy měli Brězana čitać
Budyska Lěwica rozmołwny wječor na česć Jurja Brězana zarjadowała
Budyšin (CS/SN). 9. junija před 110 lětami je so Jurij Brězan narodźił. Składnostnje tuteje róčnicy je Budyska Lěwica wčera na rozmołwu do Serbskeho domu přeprosyła. Přitomna bě tam mjez druhim jeho přichodna dźowka Beata Brězanowa. Wona rozprawješe wo šulerskim projekće, kotryž běchu wjacori akterojo 9. a 10. junija w Budyšinje zarjadowali (SN rozprawjachu) a na kotrymž bě so něhdźe 170 šulerjow serbskich šulow wobdźěliło. Nimo wopomnjenskeje tafle na něhdyšim bydlenskim domje spisowaćela na Alberta Schweitzerowej 18, kotruž bě Beata Brězanowa na swójske kóšty připrawić dała, pak njeje w sprjewinym měsće žanych dalšich zjawnych dopomnjenkow na najsławnišeho serbskeho spisowaćela 20. lětstotka. Přitomni běchu sej přezjedni, zo sej Brězan wjace připóznaća měšćanskeje towaršnosće zasłuži.
Texaski Serb David Goeke zemrěł
Potomnicy Serbow w Texasu su lětsa nalěto třoch zasłužbnych muži zhubili, kotřiž su w minjenych lětdźesatkach pěstowanju tamnišeho serbskeho namrěwstwa přinošowali. Slawist Charles Wukasch zemrě 2. měrca a stawiznar George R. Nielsen 9. apryla (na njeju su Serbske Nowiny 7.5. a 5.6.2026 spominali). Mjeztym dóńdźe do Łužicy powěsć, zo je 29. apryla dalši aktiwny čłon towarstwa Texas Wendish Heritage Society na prawdu Božu wotešoł, wučer a prědar David Goeke w starobje 77 lět.
David Goeke narodźi so 1. awgusta 1948 w texaskej stolicy Austinje. Po tradiciji texaskich Serbow wotrosće w pobožnej lutherskej swójbje a kubłaše so na cyrkwinskich šulach. Po studiju wučerstwa a teologije sta so jedyn z prěnich nawodow křesćanskeho kubłanskeho dźěła w texaskim distrikće Lutherskeje cyrkwje Missouri-synody (LCMS).
