Mišterstwo „małych“
Porjedźenka
Přepytowanja zakónčili
Norwegska rekordneho swětoweho mištra porazyła
Dźensa w nocy wuhrachu so dwě wosmifinali swětoweho mišterstwa w kopańcy. Jude Bellingham a Harry Kane staj Jendźelsku do štwórćfinala wjedłoj. Mustwo trenarja Thomasa Tuchela doby w stadionje Actekow na kóncu z wuslědkom 3:2 přećiwo kontrahentej Mexiko. Bellingham překwapi hosćićelow z dwojimi wrotami w běhu 98 sekundow (36. a 38. mjeńšina). Kane zwyši hrajny staw w 60. mjeńšinje z jědnatku a ze swojimi šestymi wrotami w turněrje na 3:1. Mexiko drje z wrotami Juliána Quiñonesa (42.) a Raúla Jiméneza (69., jědnatka ) při wšěm derje hraješe, tola njebać redukowaneho jendźelskeho mustwa po čerwjenej karće so jim wurunanje njeporadźi. Prěni raz přěhra mexiska wubranka hru swětowych mišterstwow w stadionje Actekow.
To a tamne (06.07.26)
Rozbuchadło wohnjostroja je sobotu wječor pasažěrske lětadło při přizemjenju na lětanišćo Chicago Midway trjechiło. Mašina z 52 pasažěrami a šěsć čłonami crew pak so při tym wobškodźiła njeje a je wěsće přizemiła. Miliony Američanow su sobotu 250. róčnicu njewotwisnosće swojeho kraja tež z wohnjostrojom woswjećili.
Spěwarka Nicole, jedna z mało němskich dobyćerjow najwjetšeho wubědźowanja we wobłuku pop-hudźby Eurovision Song Contest, je kónc ARD-wusyłanja „Immer wieder Sonntags“ po lětušej sezonje kritizowała. Wona běše tam prawidłownje z hosćom a wě, zo běchu zastupne lisćiki pospochi spěšnje wupředate, tak podšmórnje. Zarjadowanje njebě jenož w staršej generaciji woblubowane – „w publikumje sedźachu stajnje tež mnozy młodźi připosłucharjo“.
Ameriski són – što je wot njeho zwostało?
USA woswjeća lětsa swoje 250lětne wobstaće a spytaja towaršnostny spagat zmištrować
Washington (dpa/SN). Što ameriski són dźensa hišće woznamjenja? W małym parku w měsće Philadelphia je mnoho rozdźělnych wotmołwow na tute prašenje. Před 250 lětami běchu w bjezposrědnej bliskosći njewotwisnosć proklamowali a z tym USA załožili. Za Aarona z Philadelphije woznamjenja ameriski són „konstantnu wěru do nadźije“. Kóždy ma šansu, wšědnje na tym dźěłać, swoje sony zwoprawdźeć. Adriana a Richard staj hinašeho měnjenja. Zo maja wšitcy samsne šansy, je za njeju łža, kotraž jeničce za běłych srjedźneje woršty přitrjechi: „Myslu sej, zo nas ameriski són dźensa skerje dusy, dyžli pokoja.“
Spominamy na Dietera Liebiga
Jako Domowinska župa Jakub Lorenc-Zalěski dóstachmy zrudnu powěsć, zo je Dieter Liebig 19. junija, jenož něšto dnjow do swojich 75. narodnin, po krótkej ćežkej chorosći zemrěł. Župa Jakub Lorenc-Zalěski je wjacore lěta z něhdyšim fararjom, krajnym radu wokrjesa Zhorjelc-kraj a spisowaćelom hromadźe dźěłała. Wědźachmy wo zhubjenju wsy Němski Osiek Berzdorfskeje jamy dla, wo přesadźenju a nowonatwarje cyrkwje do Zhorjelca-Königshufena.
Ze zhubjenjom domizny a nowym započatkom je so Dieter Liebig w knižnych zwjazkach zaběrał, kotrež wuńdźechu pod titulom „Deutsch-Ossig Report“. Wědźachmy, zo je so wón wšě te lěta ze změnami łužiskeje krajiny jamow dla zaběrał. Tuž smy jeho w lěće 2010 prosyli, tež sewjerny dźěl wokrjesa wokoło Rychwałda, Hamora, Wochoz a Slepoho zapřijeć. Z toho nasta pućowanska wustajeńca za ewangelsku wosadu Slepo. Z podpěru našeje dušepastyrki pomhachmy něhdyšemu fararjej zwiski k wot přesydlenja potrjechenym nawjazać.
Za přichod Zari
Rowno. (SN) Na wčerawšim posedźenju poradźowaceho wuběrka za prašenja serbskeho ludu poboku zwjazkoweho ministerstwa za nutřkowne naležnosće su čłonojo zakładne politiske rozsudy na zwjazkowej a krajnej runinje rozjimali. Na Njepilic statoku w Rownom su mjez druhim wo dołhodobnym zawěsćenju financowanja Załožby za serbski lud, wo skrućenju prawow narodnych mjeńšin kaž tež wo trajnym zakótwjenju serbskeje rěče a kultury diskutowali.
Nawodnica Syće za serbsku rěč a regionalnu identitu Zari Diana Pawlikowa a tamniša projektna nawodnica za kulturu Sonja Hrjehorjowa předstajištej dotalne wuslědki Zari. Tuchwilu dźěłaja na spěchowanskej próstwje za nowu dobu. Nawoda wuběrka, społnomócnjeny zwjazkoweho knježerstwa za narodne mjeńšiny dr. Bernd Fabritius, dalewjedźenje projekta podpěruje. Wón chwaleše zdobom serbsku wokolinu.
Wadephul zakónči jězbu
Brasilia (dpa/SN). Zwjazkowy wonkowny minister Johann Wadephul (CDU) swoju wjacore dny trajacu jězbu po Južnej Americe dźensa, pjatk, zakónči. Poslednja stacija je brazilska stolica Brasilia. Tam zetka so wón ze swojim brazilskim kolegu Maurom Vieira. Runje tak kaž na prěnich stacijach jězby po łaćonskej Americe steješe dźensa wospjet zwoprawdźenje wikowanskeho dojednanja Mercosur mjez Europskej uniju a Brazilskej, Argentinskej, Paraguayjom a Uruguayjom na agendźe. Tute běchu spočatk meje nachwilnje schwalili.
Kabinet dwójny etat zapodał
Drježdźany (dpa/SN). Sakske knježerstwo chce w přichodnymaj lětomaj něhdźe 53,5 miliardow eurow wudać. „Cyłkowny etat je z tym tak wulki kaž hišće nihdy do toho“, zdźěli ministerstwo za financy. Za lěto 2027 planuja wudawki we wysokosći 26,5 miliardow eurow, za 2028 we wysokosći 27 miliardow. Kabinet je so na namjet dojednał a jón krajnemu sejmej za wuradźowanje přepodał. Dokelž swójske dochody hižo njedosahaja, zadołži so Sakska z dohromady 1,5 miliardami eurow.
