To a tamne (09.06.26)
Jako policist předrasćeny chcyše sej 19lětny młodostny w spěšniku z Kassela do Berlina jězdźenku zalutować. Konduktor pak jemu stawiznu wo słužbnej jězbje wšelakich njejasnych wuprajenjow dla tak prawje wotkupić nochcyše. Tohodla informowaše přichodny policajski zarjad. Jako prawi zastojnicy młodeho skućićela na Hannoverskim dwórnišću wočakowachu, spyta tón ćeknyć. Po krótkej přesćěhańcy wšak jeho popadnychu a zajachu.
Wulki łós (Elch), kotryž je na łukach a w lěsach podłu awtodróhi A 10 kołowokoło Berlina po puću, je minjene dny wo spodźiwanje mjez šoferami a jich sobujěducymi zadźiwał. Tuta, po cyłym swěće najwjetša družina jelenjow w Němskej poprawom zadomjena njeje. Po wobkedźbowanjach fachowcow stej w Braniborskej tuchwilu dwě zwěrjeći po puću. Łosy přichadźeja z Pólskeje sem. Tam je wjetša populacija žiwa.
Ruce do klina njezłoži
Znaju ju jako přećelnu, kreatiwnu, stajnje spušćomnu, zaměrnu a wotewrjenu žonu, a je wulke zbožo, ju jako poradźowarku a zwólniwu pomocnicu poboku měć: Rejzu Šěnowu. Zašłu sobotu je rodźena Koslowčanka, kotraž dźensa w Budyšinje bydli, swoje 75. narodniny woswjećiła.
Swoboda wohrožena
Berlin (B/SN). Zamołwity za swobodu nabožinow a swětonahladow zwjazkoweho knježerstwa Němskeje Thomas Rachel zwěsći, zo je „wulke wužadanje, hospodarske zajimy a zasadźenje za nabožinsku a swobodu swětonahladow zjednoćić. W Chinje na přikład su muslimscy Uigurojo a tibetanscy buddhisća a druhdźe křesćenjo ćežkim represalijam wustajeni. Zwěsćamy po cyłym swěće rozšěrjenje awtoritarnych statow a diktaturow.“ Wón sej tuž žada, zo so tež zwjazkowe knježerstwo dale a bóle za swobodu nabožinow a wěry po cyłym swěće zasadźuje.
Metropolit podhladny
Praha (B/SN). Policija je při kontroli na awtodróze do Prahi Rusko-ortodoksneho metropolita Hilariona z drogami lepiła a nachwilnje zajała. Rěčnica čěskeje narodneje drogoweje centrale Lucie Šmoldasová praji, zo bě anonymny pokiw za kontrolu dóstała. Metropolit Hilarion je kandidat za zastojnstwo patriarcha w Moskwje. Za rěčnicu ruskeho wonkowneho ministerstwa Mariju Zacharowu su to „inscenowane wobwinowanja“. Katolik cyrkej kupił
Před Filipinami zemja ržała
Manila/Jakarta (dpa/SN). Ćežke zemjerženje ze sylnosću 7,8 su zamołwite zarjady dźensa rano na južnych Filipinach před pobrjohom prowincy Sarangani registrowali. Stracha tsunamija dla namołwjeja wobydlerjow wjacorych filipinskich přibrjóžnych regionow, so do wyše ležacych kónčin podać. Tež na indoneskej kupje Sulawesi warnuja zarjady ludźi před tsunamijom.
Přihotuja klimowy wjeršk
Bonn (dpa/SN). Wot dźensnišeho schadźuje so 6500 zastupjerjow z dohromady 186 krajow na dźesaćdnjowskej konferency w Bonnje, zo bychu přichodnu swětowu klimowu konferencu přihotowali. Wona wotměje so lětsa w nowembrje w turkowskim měsće Antalya. Zwjazkowy minister za wobswět Carsten Schneider (SPD) wuzběhny, zo chce so Němska za to zasadźować, zo mjezynarodne zhromadźenstwo swój podźěl naslědneje energije spěšnišo zwyši.
Kosowo: Kurtija znowa wolili
Najebać dešćojte wjedro su so w Drježdźanach kónc tydźenja ...
Iran a Israelso atakowałoj
Bamž na wopyće w Španiskej
Namołwjeja Putina z Ukrainu jednać
Pašinjan wólby dobył
Wjetšina Armenjanow wčera Europje přichilenemu kandidatej hłós dała
Jerjewan (dpa/SN). We wčerawšich wólbach swojeho parlamenta su Armenjenjo tež wo tym wothłosowali, kotry kurs kawkaska republika w přichodźe změje: Zapadny z wusměrjenjom na EU abo wuchodny z wusměrjenjom na Rusku. Po prěnich wólbnych wuslědkach je strona Ciwilne zrěčenje dotalneho premierministra Nikola Pašinjana z 49,8 procentami wólby jasnje dobyła. Na druhim městnje leži strona Sylna Armenska proruskeho předewzaćela a miliardara Samvela Karapetjana ze 23,3 procentami. Nawodnica wobkedźbowarskeje misije OSZE Farah Karimi wopisa wólbny bój w minjenych tydźenjach, kiž bě połny mjezsobnych wumjetowanjow a wobwinowanjow, jako „ekstremnje polarizowacy“. Zastupjer armenskeho knježerstwa wumjetuje ruskemu knježerstwu, zo je w Ruskej bydlacych Armenjanow za to zapłaćiło, zo k wólbam do swojeje domizny jědu a tam za proruske strony hłosuja. Armeniske zarjady su w tutym zwisku wjacore chłostanske jednanja zahajili, jasne dopokazy za wobwinowanje pak dotal prezentowali njejsu.
