Serbski dźiwadźelnik Křesćan Bart zemrěł
Němsko-Serbske ludowe dźiwadło Budyšin spomina na swojeho čłona Křesćana Barta, kiž je 15. meje w Hamburgu w starobje 91 lět zemrěł. 4. julija 1934 rodźeny w Delnim Wujězdźe je Křesćan Bart trojorěčnje wotrostł. Swoju maturu złoži na gymnaziju we Warnoćicach. Swoju lubosć k dźiwadłu je sej na zažnych wopytach dźiwadła wotkrył. K tomu přinošowaše tež jeho nan, kiž bě aktiwny hrajer lajskeje dźiwadłoweje skupiny. Wot toho časa postajowaše hraće na jewišću žiwjenje Barta. W lěće 1948 słušeše wón do kruha załožerjow Serbskeho dźiwadła w Budyšinje.
Po swojim studiju slawistiki w Lipsku je Křesćan Bart jako asistent za režiju a dramaturgiju pod intendantom Janom Krawcom w Budyskim dźiwadle skutkował. Wot hrajneje doby 1958/1959 hač do 2004/2005 bě wón kruty ansamblowc Němsko-Serbskeho ludoweho dźiwadła w Budyšinje. 1961 złoži swoje činohrajne pruwowanje. Hišće hač do poslednjeho předstajenja „Olsenoweje cwólby“ w lěće 2018 skutkowaše wón jako hósć na jewišću a tak jako najstarši (hósć) dźiwadźelnik domu.
To a tamne (26.05.26)
Němc Tom Kopke z Mnichowa je předwčerawšim třeći raz pospochi kuriozne wubědźowanje w jendźelskim městačku Brockworth dobył. Dźesatki mužow spěchaja w hrabinstwje Gloucestershire lěto wob lěto za kulowatym twarožkom, kiž po skłoninje dele kula. Wubědźowanje ma dołhu tradiciju. Spočatki tča pječa w pohanskim nalětnim nałožku.
Pytajo za swojim črijom bě muž bjez wotpohlada do wobhrodźenja bizonow Mnichowskeho zwěrjenca běžał. Sam pak tam hižo won přišoł njeje. Jako bě sej wuwědomił, zo tči w strašnej situaciji, bě so za elektriskim płotom schował a policiju wołał. Zastojnicy jeho potom nadeńdźechu a zhromadnje ze sobudźěłaćerjemi zwěrjenca wuswobodźichu. Črij młodeho muža běchu naposledk tež nadešli. Małych ranow dla jeho w chorowni lěkowachu.
Spiona wobskoržili
Karlsruhe (dpa/SN). Zwjazkowe rěčnistwo je skóržbu přećiwo mužej zapodało, kotryž je w nadawku Irana Židow a přećelow Israela za móžne atentaty wuslědźował. Mjez nimi běštaj prezident Centralneje rady Židow Josef Schuster a prezident Němsko-Israelskeje towaršnosće Volker Beck. Zarjadnistwo w Karlsruhe wobskorži Dana z afghaniskimi korjenjemi agentoweho skutkowanja za tajnu słužbnu dla. Sobu wobskorženy je komplica, kiž je jemu podpěru za přihot nadpada slubił.
Air France a Airbus zasudźenej
Paris (dpa/SN). W powołanskim procesu w zwisku ze smjertnym lětom wot Rio de Janeira do Parisa w lěće 2009 su sudnicy winu lětadłotwarca Airbus a lětanskeje towaršnosće Airfrance wopodstatnili. Powołanske sudnistwo w Parisu zasudźi wobě předewzaći njekedźbliweho morjenja dla a postaji za kóžde pjenježnu pokutu we wobjimje 225 000 eurow. Dohromady 228 ludźi běše w njezbožu zahinyło, mjez nimi tež 28 Němcow.
Na migraciske centry so dojednali
Wosrjedź New Yorka, w financnej štwórći blisko dróhi Wall Street, ...
Sudetscy Němcy w Brnje
Sakska: AfD w prognozy prědku
Drježdźany (dpa/SN). W najnowšim woprašowanju slědźenskeho instituta Insa by tuchwilu w Sakskej 42 procentow wolerjow stronu AfD z druhim hłosom do krajneho sejma woliło. Z 21 procentami dóstanje CDU jenož połojcu telko hłosow. Za Lěwicu by 9 procentow a za Zwjazkarstwo Sahra Wagenknecht BSW 7 procentow sakskich wolerjow hłosowało. Stronje SPD a Zeleni docpějetej kóžda 6 procentow.
Insa je studiju w nadawku powěsćoweho portala Nius přewjedła a so w časowej dobje mjez 13. a 20. meju dohromady 1 000 ludźi online naprašowała. Stronski a frakciski šef AfD Jörg Urban rjekny hladajo na wuslědk: „Woprašowanja su wuraz wokomikneje nalady w ludźe. Rozsudny moment pak su wólby.“ Wón přispomni, zo je přiwšěm wočiwidne: Dowěra ludźi do strony CDU zwjazkoweho kanclera Friedricha Merza a ministerskeho prezidenta Michaela Kretschmera masiwnje popušća.
Dalše reformy schwalić
Trump: 5 000 wojakow za Pólsku
Wojersku móc demonstrowałoj
Ruska a Běłoruska w manewrje tež móžne nuklearne brónje zasadźiłoj
Moskwa (dpa/SN). K wukóncej wobšěrneho wojerskeho manewra je Ruska wčera cyły arsenal móžnych nuklearnych raketow wupruwowała. Zakitowanske ministerstwo w Moskwje zdźěli, zo su móžnu interkontinentalnu atomowu raketu typa Jars w sewjernej Ruskej z cilom na połkupje Kamčatka na dalokim wuchodźe wottřělili. Ruski prezident Wladimir Putin a jeho zwjazkar, prezident Běłoruskeje Aleksander Lukašenko staj wčerawši manewer při wobrazowce sćěhowałoj. Triada nuklearnych brónjow na kraju, w morju a w powětře je „garant suwerenity rusko-běłoruskeho zwjazkarstwa“, praji Putin. Wón wuzběhny, zo maja brónje swójskemu zakitowanju słužić a zo chce ruski arsenal atomowych bróni wobnowić. Lukašenko rjekny běłoruskej powěsćerni BELTA, zo so Běłoruska do wójny w Ukrainje nutř ćahnyć dać nochce. W padźe nadpada ze stron Ukrainy pak by so wona hromadźe z Ruskej zakitowała. W Běłoruskej je Ruska swoju najnowšu raketu za srjedźne distancy typa Oreschnik stacionowała.
