To a tamne (15.05.26)
Pjeć italskich nurjakow je před Malediwami swoje žiwjenje přisadźiło. Wo tym informuje italske wonkowne ministerstwo. Nurjacy chcychu sej prózdnjeńcy we hłubokosći 50 metrow wobhladać, w zdźělence z Roma dale rěka. Detaile hišće znate njejsu. Zastojnicy na Malediwach njezbožo nětko přepytuja. Mjez nurjakami běchu po informacijach italskich medijow štyrjo studenća resp. sobudźěłaćerjo uniwersity w Genuwje.
Noweho Jamesa Bonda pyta filmowe studijo Amazon MGM. Wo tym informowachu zamołwići na platformje X. Hižo wjacore lěta mnozy wo tym spekuluja, kotry dźiwadźelnik móhł rólu přewzać. Tež bulwarne nowiny běchu wjace króć wo tym hódali. Insiderojo měnja, zo budźe nowy Bond pječa mało znaty britiski dźiwadźelnik w starobje kónc dwaceći, spočatk třiceći lět.
Trump wopyta Chinu
Washington (dpa/SN). US-prezident Donald Trump je so dźensa na statny wopyt do Chiny podał. Wot lěta 2017 je to prěni wopyt Trumpa w Chinje. Temy rozmołwow su mjez druhim móžne wikowanske dojednanje kaž tež wójna mjez USA a Iranom a jeje wuskutki. Ameriskeho prezidenta přewodźuje hospodarska delegacija, kotrejž přisłušataj tež šefaj předewzaćow Tesla a Apple Elon Musk a Tim Cook.
Zahaja dźeń katolikow
Würzburg (dpa/SN). We Würzburgu zahaja dźensa wječor 104. dźeń katolikow w Němskej. Na nim wobdźěla so mjez druhim zwjazkowy prezident Frank-Walter Steinmeier (SPD), zwjazkowy kancler Friedrich Merz (CDU) a ministerski prezident Bayerskeje Markus Söder (CSU). Dohromady je 900 zarjadowanjow planowanych, nimo Božich mšow na př. hudźbne koncerty abo podijowe diskusije. Diskutować chcedźa mjez druhim wo reformowym hibanju w katolskej cyrkwi kaž tež wo jeje rozestajenju ze seksualizowanej namocu.
Dźěłowe městna fuk
Britiski wuměłc KAYA MAR je wčera na Londonskej Downing Street ...
Za reformu wabił
Komuny z mjenje dochodami
„Buh“ za Merza, aplaws za Bas
Berlin (dpa/SN). Zwjazkowy kancler Friedrich Merz (CDU) je wčera na zwjazkowym kongresu Zwjazka dźěłarnistwow Němskeje (DGB) za planowane wulke socialne reformy wabił. W swojej narěči wuzběhny, zo je proces reformow šansa, nic wohroženje, a zo dyrbjeli wšitcy w nim sobu skutkować. Tola wothłós mjez něhdźe 400 delegatami DGB běše snadny. Nawopak: Z wótrymi komentarami a wuhwizdanjom předsydu CDU wospjet mylachu a jeho narěč přetorhnychu. Tež z plakatami zwuraznichu swoju kritiku na planowanych naprawach knježerstwa, mjez druhim z hesłom: „Solidarisce financować. Wěsće zastarać. Socialny stat zakitować“. Podobnje bě so tež bywšej kanclerce Angeli Merkel na jeje wopyće kongresa DGB w lěće 2018 zešło. Tam su ju wuhwizdali, jako plany knježerstwa za zastup do renty ze 67 lětami předstaji.
Protest přećiwo faktam
Našim čitarjam
Jutřišeho Božeho spěća dla dóstanjeće přichodne wudaće SN pjatk, 15. meje.
Redakcija SN
To a tamne (13.05.26)
Mäc Geiz – wobchod za tunje produkty – je tutón tydźeń próstwu wo insolwencu zapodał. Předań w dohromady 180 filialach pak ma tuchwilu pokročować, zdźěla zamołwići na internetnej stronje předewzaća, kotrež ma w Saksko-Anhaltskim Landsbergu swoje sydło a w kotrymž něhdźe 1 200 ludźi dźěła. Jako přičinu za rozsud mjenuja zasadnu zdźeržliwosć kupcow w časach hospodarskeje njewěstosće.
Howjada z pastwy pokradnyli su paduši w Braniborskej – a to hižo trěći raz w běhu minjenych tydźenjow. Njeskutk sta so tónraz we wjesce Grano we wokrjesu Sprjewja-Nysa. Potrjecheny plahowar zhubi 31 howjadow. W zdźělence powěsćernje dpa zwurazni prezident Krajneho burskeho zwjazka Henrik Wendorff, zo ma za prawdźepodobne, zo skućićeljo zwěrjata do wukraja wjezu a je tam zarězaja.
