Genf (dpa/SN). Běrow UNO za čłowjeske prawa w Genfje kritizuje najnowše aktiwity Israela nastupajo židowske wobsydlenje wobsadźenych palestinskich kónčin w Zapadnojordanskim kraju a we wuchodnym dźělu Jerusalema. Israelej wumjetuja wójnske złóstnistwa.

Israelscy policisća běchu 12. januara we wuchodźe Jerusalema wjace hač 70 twarjenjow zničili a 25 Palestinjanow zajeli. Nimo toho su domy a wobchody přepytowali a wobsydstwo Palestinjanow sćazali. Wočiwidnje planuja tam nowe židowske sydlišća. Po 23. januaru su w muslimskim dźělu Jerusalemskeho stareho města wobydlerjam 22 domow wućahnyć kazali. Minjene měsacy běchu z podobnymi akcijemi sta Palestinjanow z jich domizny wuhnali.

Berlin (dpa/SN). SPD chce financowanje strowotnistwa a hladanja potrěbnych hinak rjadować. „Chcemy na tutym městnje financowanje sprawnišo organizować a perspektiwisce wšitke formy dochodow zapřijeć“, rjekny předsydka SPD a ministerka za dźěło Bärbel Bas w Berlinje. Nimo mzdy móhli potom tež dochody z kapitala abo podruž wobkedźbować. Dotal tole jenož pola dobrowólnych sobustawow chorobnych kasow sobu liča, a to tež jenož hač k hornjej mjezy wobličenja.

Dołhodobny zaměr je, přinoški ludźi za chorobne kasy znižić. Takle rěka w dokumenće stronskeje předsydki, kotryž je wona stronskemu předsydstwu posrědkowała a kiž časopisej Spiegel předleži. Dokument złožuje so na mjezyrozprawu stronskeje interneje komisije wo reformje socialneho stata. SPD sej w nim žada, zo měli tež zastojnicy, samostatni a nošerjo mandatow přichodnje do rentoweje kasy přinošować, podobnje kaž w druhich krajach. „Štóž dźěła, płaći přinoški“, rěka nowy princip.

Dźěłarnistwa kritizuja debatu wo skrótšenjach socialneho systema

Berlin (dpa/SN). W diskusiji wo reformje socialneho stata su sej wšitke wulke dźěłarnistwa přezjedne a dźěłodawarjow a uniju CDU/CSU raznje kritizuja. W zhromadnym dokumenće žada sej Němski zwjazk dźěłarnistwow, IG Metall, ver.di a šěsć dalšich dźěłarnistwow kónc „debatow wo skrótšenjach“. Nadpady unije a dźěłodawarjow na socialny stat a dźěławych su lózyske, w deklaraciji rěka.

Zastupnicy hospodarstwa su stejišćo dźěłarnistwow hnydom wotpokazali. Deklaracija dopokazuje, kak zastarske a za diskusiju njekmane dźěłarnistwa su. Tole njeje žadyn přinošk za zmištrowanje wužadanjow, ale skomdźena šansa za kraj, Zwjazkowe zjednoćenstwo dźěłodawarjow zdźěli.

Hižo měsacy w Němskej hladajo na słabe hospodarstwo a wysoke wudawki stata wo reformje socialneho stata diskutuja. „Socialny stat, kajkiž jón dźensa mamy, njemóžemy z tym, štož ludohospodarsce zdokonjamy, hižo financować“, bě zwjazkowy kancler Friedrich Merz (CDU) loni w lěću rjekł.

Nimo je wón – tón wječorny ptačokwasny program SLA. Móžu telko rjec, zo smy sobu spěwali a kleskali. Sym so nad inscenaciju Čorneje młynkoweje smějkotała, mi chcyše so z jejom stepować a sym so nad angažementom rejwarki a rejwarja w chórje dźiwała. Skónčnje so tež wobě serbskej rěči runohódnje na jewišću wužiwaštej. Mějach ćeže z techniku – spěwane bě zdźěla špatnje rozumić. Přiwšěm je chór SLA hłósnje a hrajersce derje agěrował. Kompozicija njeběše stajnje hłosej interpreta-solista přiměrjena. Ach haj, hudźbje by trochu wjace kwasneho błyšća tyło, štož je dirigent ze swojim temperamentom wurunać spytał. Finalu pobrachowaše woprawdźity wjeršk. Pohnu pak mje, so na swójski kwas dopominać. Tehdy bě hosćina rozdźěle mjez nałožkami w Budyskich a Kulowskich kónčinach zwěsćiła. Što chcu wjac? Wot němskeho, nic słowjanskeho pjera napisany program SLA, kotryž je kóžde lěto nowy, bě solidny. Klětuši, to ptački hižo fifola, budźe - cyle hinaši. Milenka Rječcyna